Printer-friendly version

ডিজিটেল ডেস্কঃ চীনৰ এখন বিশ্ববিদ্যালয়ে বাৰ্ষিক খেল সপ্তাহত অন্তৰ্ভুক্ত কৰিছে এই নাভুত-নাশ্ৰুত খেল। প্ৰতিযোগীতাত প্ৰাৰ্থীয়ে জেভলিন, ডিচকাচ দলিওৱাৰ পৰিৱৰ্তে দলিয়াব লাগিব গ্ৰেনেড। চীনৰ এখন পত্ৰিকাৰ খবৰ অনুযায়ী এই শিহৰণকাৰী খেল পাতিছে চীনৰ উত্তৰাঞ্চলৰ এখন প্ৰদেশৰ নৰ্থ ইউনিভাৰ্ছিটি অব চাইনাই। 

মে’ মাহত অনুষ্ঠিত হ’বলগীয়া এই খেলখনত ৫০০ গ্ৰাম ওজনৰ গ্ৰেনেড দলিয়াব লাগিব খেলুৱৈয়ে। দৰাচলতে এনে এবিধ ভয়ংকৰ খেল কিয় পাতিবলগীয়া হ’ল, সেইবিষয়ে বিবিচিক বিশ্ববিদ্যালয়খনৰ লি জিয়ান শ্বি নামৰ অধ্যাপকজনে দিয়া বাখ্যা মতে ছাত্ৰ-ছাত্ৰীৰ খেলৰ প্ৰতি অনীহাৰ ভাব জাগিছে। সেয়ে এসময়ৰ জনপ্ৰিয় ডিচকাচ থ্ৰ’ৰ ঠাইত এইবাৰ গ্ৰেনেড থ্ৰ’ প্ৰতিযোগীতা পাতি আগৰ উৎসাহৰ পৰিৱেশ ঘুৰাই অনাৰ চেষ্টা চলাইছে বিশ্ববিদ্যালয়খনে। 

আগতে প্ৰতিযোগীতাত খেলুৱৈৰ অভাৱ ঘটিছিল। কিন্তু এইবাৰ শাৰী পাতি প্ৰপত্ৰ পুৰণ কৰিছে ছাত্ৰ-ছাত্ৰীয়ে। কিছুমানে আকৌ প্ৰপত্ৰ পুৰণ কৰিব নাপাই দুখ প্ৰকাশো কৰিছে। এই নতুন খেলবিধৰ আচলতে ধাৰণা আহিছিল ছাত্ৰ এজনৰ মনলৈ। উ জিয়াংহ্যাং নামৰ ছাত্ৰজনে কৰ্তৃপক্ষলৈ এই খেলৰ বাবে প্ৰস্তাৱ দাখিল কৰিছিল। 

খেলবিধত দৰাচলতে গ্ৰেনেডৰ লেখীয়া আকৃতিৰ ৫০০ গ্ৰাম ওজনৰ সামগ্ৰীৰ সৈতে এডাল কাঠৰ দণ্ড সংযোগ কৰা থাকিব। দ্বিতীয় বিশ্বযুদ্ধৰ সময়ত চীনা সামৰিক বাহিনীয়ে এনেদৰে কাঠৰ দণ্ডত গ্ৰেনেড লগাই দলিওৱাৰ অনুসৰণ কৰিছিল।

বিশ্ববিদ্যালয়খন প্ৰতিষ্ঠা হৈছিল ১৯৪১ চনত আৰু সেই সময়ত পিপলচ লিবাৰেছন আৰ্মিৰ ঘাটি আছিল বিশ্ববিদ্যালয়খন। তেতিয়া বিশ্ববিদ্যালয়খনৰ নাম আছিল টাইহাং ইণ্ডাষ্ট্ৰিয়েল স্কুল।