Printer-friendly version

লাহোৰঃ জম্মু আৰু কাশ্মীৰৰ পুলৱামাত যোৱা ১৪ ফেব্ৰুৱাৰীত চি আৰ পি এফৰ কনভয়ত আক্ৰমণ কৰা সন্ত্ৰাসবাদী সংগঠন জইছ-ই-মহম্মদৰ প্ৰশাসনিক মুখ্য কাৰ্যলয় অৱশেষত আন্তঃৰাষ্ট্ৰীয় হেঁচাত সেও মানি পাকিস্তান চৰকাৰে নিজৰ নিয়ন্ত্ৰণলৈ আনিছে।

পাকিস্তানৰ বন্ধু ৰাষ্ট্ৰ চীনকে ধৰি ৰাষ্ট্ৰসংঘৰ নিৰাপত্তা পৰিষদৰ ১৫ খন দেশৰ কেউখনে ৪২ জন চি আৰ পি এফ জোৱান নিহত হোৱা পুলৱামা আক্ৰমণত জড়িত জইছ-ই-মহম্মদৰ নাম উল্লেখ কৰি এই ঘটনাক বৰ্বৰ আৰু কাপুৰুষালি কাৰ্য বুলি কঠোৰতৰ ভাষাৰে গৰিহণা দিয়াৰ এদিনৰ পাছতে পাকিস্তান চৰকাৰে এই পদক্ষেপ গ্ৰহণ কৰে। নিৰাপত্তা পৰিষদৰ প্ৰস্তাৱটোত এনে নিন্দনীয় কাৰ্য সংঘটিত কৰা আৰু ইয়াৰ বাবে ধনৰ যোগান ধৰা সকলো পক্ষকে জগৰীয়া কৰি বিচাৰ হ’ব লাগে বুলি উল্লেখ কৰে।

আন্তঃৰাষ্ট্ৰীয় মহলৰ হেঁচাৰ পাছত পাকিস্তানৰ তথ্য আৰু সম্প্ৰচাৰণ মন্ত্ৰী ফাৱাদ চৌধুৰীয়ে কয়, জইছ-ই-মহম্মদৰ বাহাৱালপুৰত থকা মুখ্য কাৰ্যালয়ৰ নিয়ন্ত্ৰণ পঞ্জাব চৰকাৰে নিজৰ নিয়ন্ত্ৰণলৈ আনিছে। কাৰ্যালয় চৌহদত থকা মাদ্ৰাছাতুল ছাবিৰ আৰু জামা-ই-মছজিদ ছুভানাল্লাহৰ কাম-কাজ চোৱা-চিতা কৰিবৰ বাবে এজন প্ৰশাসনিক বিষয়াক নিযুক্তি দিয়া হৈছে।

পাক প্ৰধানমন্ত্ৰী ইমৰাণ খানৰ সভাপতিত্বত অনুষ্ঠিত হোৱা ৰাষ্ট্ৰীয় নিৰাপত্তা পৰিষদৰ সভাত জইছ-ই-মহম্মদৰ ওপৰত বিহিত ব্যৱস্থা লোৱা সিদ্ধান্তৰ পৰিপ্ৰেক্ষিততে এনেদৰে জইছৰ বিৰুদ্ধে কাৰ্যপন্থা লোৱা হ’ল বুলি জনাইছে তথ্য আৰি সম্প্ৰচাৰণ মন্ত্ৰীজনে।