Printer-friendly version

মুম্বাইঃ কমেডীৰ কিং কপিল শৰ্মাই অৱশেষত যুগ্ম জীৱনৰ পাতনি মেলিলে৷ নিকয়াংকা, দীপবীৰৰ বিয়াৰ পাছত যোৱা ১২ ডিচেম্বৰত প্ৰেয়সী গিন্নী ছতৰথৰ লগত বিবাহপাশত আৱদ্ধ হয় এই গৰাকী কমেডীয়ান৷

জলন্ধৰত অনুষ্ঠিত হোৱা এই বিবাহত পৰিয়াল আৰু আত্মীয়-স্বজনহে সন্মিলিত হয় আৰু তেওঁলোকৰ পৰম্পৰাগত ৰীতিৰে এই বিয়া সম্পন্ন হয়৷ প্ৰায় ৪ বছৰৰ পূৰ্বে সম্পৰ্ক স্থাপনৰ পাছত এই প্ৰেম-যুগলে আনুষ্ঠানিভাৱে ৰীতি-নীতিৰে বিয়া পাতে৷

কপিলে জনোৱা মতে তেওঁৰ অকলশৰীয়া সময়ত গিন্নীয়ে উৎসাহ দিয়াৰ বাবে গিন্নী তেওঁৰ বাবে এক বিশেষ উপহাৰ স্বৰূপ৷ দৰাচলতে হাঁহিৰ খুৰাকেৰে সকলোৰে হৃদয় জিনিব পৰা তথা সকলোৰে মুখত হাঁহি বিৰিঙাইছিল কপিল শৰ্মাৰদ্বাৰা পৰিচালিত ‘দ্যা  কপিল শৰ্মা শ্ব’' নামৰ অনুষ্ঠানটিয়ে৷ বলিউড, হলিউড, খেলুৱৈ, সাংবাদিকৰপৰা ৰাজনীতিজ্ঞলৈকে হঁহোৱাব পৰা কপিলৰ অনুষ্ঠানটো বন্ধ হৈ গৈছিল৷

জানিব পৰা মতে কপিলৰ এই অনুষ্ঠানটি পুনৰ আৰম্ভ হ’ব৷ শেহতীয়াকৈ ২৪ ডিচেম্বৰত কপিল আৰু গিন্নীৰ ৰিচিপশ্বন পাৰ্টী মুম্বাইস্থিত ফাইভ ষ্টাৰ হোটেল জে ডব্লিউত অনুষ্ঠিত কৰা হয়৷ তেওঁলোকৰ এই বিবাহ অনুষ্ঠানত বহুতো তাৰকা, খেলুৱৈ, জনপ্ৰিয় শিল্পী উপস্থিত হৈ তেওঁলোকক শুভেচ্ছা জ্ঞাপন কৰে৷