বিশেষ ছ'চিয়েল মিডিয়া প্ৰতিবেদনঃ হঠাৎ ছ’চিয়েল মিডিয়া ভৰি পৰিল অশ্ৰু-অঞ্জলিৰে। সকলো মৰ্মাহত। অথচ কোনেও তেওঁক কাষৰ পৰা দেখা নাছিল। সকলোৱে ইস-আস কৰি উঠিছে। মৃত্যুৰ কোলাত ঢলি পৰিবলৈ বয়সনো কিমান হৈছিল? মাত্ৰ ২৮ বছৰ। কিন্তু মহামাৰীৰ সমুখত ডাঙৰ-সৰু বুলি কোনো কথা নাই। সেয়ে পোষ্ট ক’ভিডত শনিবাৰে নিশা এই পৃথিৱীক চিৰ বিদায় জনালে কোনেও নেদেখা, কোনেও এষাৰ মাত দি নোপোৱা অচিনাকি হৈয়ো চিনাকি ছোৱালীজনীয়ে।

সকলোকে এনেদৰে শোকৰ অথাই সাগৰত পেলাই থৈ যোৱা এই ছোৱালীজনীয়েই হৈছে ডাঃ সুকৃতি চৌধুৰী। নামটো যিদৰে সুকৃতি তেওঁৰ কামবোৰো তেনেকুৱাই আছিল। কাকো এষাৰিও বেয়াকৈ কৈ পোৱা নাছিল সুকৃতিয়ে। কোনোৱে দোভাগ নিশা ফেচবুকৰ মেছেঞ্জাৰত মেছেজ কৰি সমস্যাৰ কথা সুধিলেও তপৰাই সুন্দৰকৈ উত্তৰ দিছিল সুকৃতিয়ে। ফেচবুকৰ ভিন্ন গ্ৰুপ আৰু পেজত সুকৃতিয়ে কেৱল ভাল ভাল কথাবোৰেই লিখিছিল। হত্যা-হিংসা, মহামাৰীৰে ভৰি থকা এই পৃথিৱীত বহুজনৰ বাবে সুকৃতিয়ে সহজ-সৰল আৰু শুৱলা ভাষাৰে অসমীয়াতে লিখা ফেচবুক পোষ্টসমূহ আছিল সঞ্জীৱনী সদৃশ।

সেয়ে কোনেও মানি ল’ব পৰা নাছিল অসম এৰি থৈ সুদূৰ জাপানত বাস কৰা নলবৰীয়া যুৱতীগৰাকীৰ মৃত্যুৰ সেই সংবাদ। টিভিত ব্ৰেকিং নিউজ হৈ বজা নাছিল সেই সংবাদ। নিউজ চেনেলৰ ক’তোৱেই নাছিল সুকৃতিৰ মৃত্যুৰ খবৰৰ সবিশেষ। কিন্তু দেওবাৰে বিয়লিলৈকে সমগ্ৰ অসমৰ লক্ষ লক্ষ নেটিজেনৰ মাজত বিয়পি পৰিছিল এই দুঃসংবাদ। সকলোৱে টিভিলৈ চাইছিল, নিউজ ৱেবছাইটসমূহৰ ফেচবুক পেজলৈ চাইছিল কিজানিবা ডাঃ সুকৃতি চৌধুৰীৰ মৃত্যুৰ খবৰৰ সবিশেষ ওলায়েই। কিন্তু দুই এটা অসম্পূৰ্ণ খবৰৰ বাদে ক’তোৱেই ওলোৱা নাছিল সেই খবৰ।

ক’ত কেনেকৈ পাৰ হৈছিল সুকৃতিৰ শৈশৱ-কৈশোৰ?

পাগলাদিয়া পাৰৰ জীয়ৰী ডাঃ সুকৃতি চৌধুৰী। পাগলাদিয়াৰ পৰা জাপানৰ ওছাকালৈ সুকৃতিৰ যাত্ৰা মুঠেই মসৃণ নাছিল। নব্বৈ দশকৰ শেষৰ ফালে অসমৰ ভিন্ন জিলাৰ লগতে নলবাৰীকো চুই গৈছিল গুপ্তহত্যাই। সুকৃতিৰ মাত-ফুটা নুফুটা বয়সতেই গুপ্তঘাতকৰ হাতত প্ৰাণ হেৰুৱাইছিল সুকৃতিৰ পিতৃয়ে। একাংশৰ মতে আকৌ সুকৃতিৰ পিতৃক আলফাই হত্যা কৰিছিল। এই ঘটনাৰ পিছতে মানসিক ভাৰসাম্য হেৰুৱাই পেলাইছিল সুকৃতিৰ মাতৃয়ে। তাৰ মাজতে একলা-দুকলাকৈ ডাঙৰ হোৱা সুখ্যাতি বিদ্যালয়লৈ যাবলৈ আৰম্ভ কৰিছিল।

পিতৃহাৰা সুকৃতিৰ পৰিয়ালটোৰ ওপৰত চলিছিল ওচৰ-চুবুৰীয়া আৰু আত্মীয়সকলৰো অকথ্য নিৰ্যাতন। তেনেতে এদিন বিদ্যালয়ৰ পৰা ঘৰলৈ আহি দেখে যে মাকৰ মৃতদেহ ওচৰৰ পুখুৰীত ওপঙি আছে। নিচেই কম বয়সতে ঘাট-মাউৰা হোৱা সুকৃতিক অৱশেষত সেনা বাহিনীত কৰ্মৰত এজন বিষয়াই নিজৰ লগত লৈ যায় আৰু পঢ়া-শুনাৰ সমস্ত দায়িত্ব মূৰ পাতি লয়।

এনেদৰে পাগলাদিয়াৰ পাৰ এৰি থৈ অন্যস্থানত পঢ়া-শুনা কৰি চিকিৎসক হোৱাৰ মন মেলে মেধাৱী সুকৃতিয়ে। অৱশেষত একাংশই দাবী কৰা মতে কাণপুৰত মনোৰোগ বিষয়ত অধ্যায়ন কৰি জাপানৰ ওছাকালৈ উৰা মাৰিছিল ডাঃ সুকৃতি চৌধুৰীয়ে। ক’ভিড কালত জাপানৰ ওছাকাৰ পৰাই বিভিন্ন বিষয়ত অসমৰ একাধিক ফেচবুক পেজ আৰু গ্ৰুপত লেখা-মেলা কৰি গৈছিল ডাঃ সুকৃতিয়ে। কোনো এটি লেখাত নিজেও ক’ভিডত আক্ৰান্ত হোৱাৰ কথাও কৈছিল সুকৃতিয়ে।

মৃত্যুৰ পূৰ্বে কি লিখি থৈ গৈছে সুকৃতিয়ে?

তেনেই কম বয়সতে মৃত্যুক আকোৱালি লোৱা প্ৰতিজনেই আগতেই যেন উমান পাইছিল মৃত্যুৰ কথা। সুৱদী কণ্ঠৰ অধিকাৰী জয়ন্ত হাজৰিকায়ো গাই গৈছিল মৃত্যু চেতনাৰ সেই কালজয়ী গান, 'মই নাথাকিলেও সাজৰ তৰাই মোৰেই কথাকেই ক’ব।’ হঠাৎ মঞ্চত গীত গাই চিৰদিনৰ বাবে ঢলি পৰা কেকেয়ো গাইছিল মৃত্যুৰ গান। অনুৰূপ মৃত্যু চেতনা দেখা গৈছে সুকৃতিৰ ফেচবুক পোষ্টটো।

শতাধিক ফেচবুক পোষ্টত 'জীৱন জিন্দাবাদ’ বুলি কৈ অহা সুকৃতিয়েও যেন মৃত্যুৰ পূৰ্বে শুনিছিল মৃত্যু চেতনাৰে ভৰা শব্দহীন সেই গান। সেয়ে তেওঁ লিখিছিল, 'অসুস্থতা বাঢ়ি গৈছে। উশাহ ল’বলৈকো কষ্ট। কেতিয়াবা যদি নোহোৱা হৈ যাওঁ মোক যেন পাহৰি যায়। এয়াই হাতযোৰ কৰি অনুৰোধ। ভাবি ল’ব যে এই নামৰ কাকো লগ পোৱাই নাছিল।’

পাগলাদিয়াৰ প্ৰতি আছিল সুকৃিতৰ অপৰিসীম ভালপোৱা। সেয়ে মৃত্যুৰ পূৰ্বে তেওঁ লিখিছিল, 'সম্ভৱ হ’লে মোৰ অস্থি যেন পাগলাদিয়াত বিসৰ্জন দিয়া হয়। সম্ভৱ নহ’লে নালাগে। মই অকণো বেয়া নাপাও।’ সমাজৰ নীতি-নিয়মক লৈও যেন বীতশ্ৰদ্ধ আছিল সুকৃতি। শেষ পোষ্টটোতো দি গৈছে তাৰেই উমান। 

'মোৰ বাবে কোনো শ্ৰাদ্ধৰ আয়োজন নালাগে। নালাগে কোনো স্মৃতি সভা। জীয়াই থাকোতে যদি কোনো এক মুহূৰ্তত মোৰ শব্দবোৰে আপোনাক চুইছিল কেৱল সেই ক্ষণটোকেই মনত ৰাখিব।’- জমা টকাখিনি অনাথালয়ত দিয়াৰ কথা উল্লেখ কৰি শেষ পোষ্টটোত এইদৰে লিখিছিল সুকৃতিয়ে।  

কিয় নিউজ চেনেলত বজা নাছিল সুকৃতিৰ মৃত্যুৰ খবৰ?

পুৱা ১০ বজাৰ পূৰ্বেই ছ’চিয়েল মিডিয়াত ভাইৰেল হৈ পৰিছিল জাপানত কৰ্মৰত প্ৰবাসী অসমীয়া চিকিৎসক এগৰাকীৰ মৃত্যুৰ দুঃসংবাদ। এগৰাকী জনপ্ৰিয় প্ৰবাসী অসমীয়া চিকিৎসকৰ মৃত্যুৰ খবৰ সাধাৰণতেই নিউজ চেনেল আৰু নিউজ পৰ্টেলসমূহৰ বাবে এটি বিশেষ খবৰ। সেয়ে খবৰটো পোৱা মাত্ৰকে প্ৰায় প্ৰতিটো সংবাদ প্ৰতিষ্ঠানৰ পৰা সুকৃতিৰ সবিশেষ বিচাৰি নলবাৰীৰ স্থানীয় সাংবাদিকলৈ ফোন গৈছিল। 

মুখ্য কাৰ্যালয়ৰ পৰা ফোন পাই নলবাৰীৰ প্ৰতিজন স্থানীয় সাংবাদিকে বিচাৰি ফুৰিছিল সুকৃতিৰ খবৰ। কোনোৱে কৈছিল সুকৃতিৰ ঘৰ নিজ পকোৱা গাঁৱত। কিয়নো শেষ ফেচবুক পোষ্টটোত পাগলাদিয়াৰ পাৰৰ কথা উল্লেখ কৰিছিল সুকৃতিয়ে। নলবাৰীৰ কেবাজনো সাংবাদিক উপস্থিত হৈছিল নিজ পকোৱাত। সকলোকে সুধি সুধিও নলবাৰীৰ সাংবাদিকসকলে উলিয়াব পৰা নাছিল সুকৃতিৰ সম্ভেদ। গাঁৱখনৰ কোনো পৰিয়ালৰেই জাপানত ডাক্তৰী কৰা কোনো ছোৱালী নাই বুলি সাংবাদিকসকলক স্পষ্টকৈ জনাইছিল গাঁওবাসীয়ে।

'নলবাৰীৰ বহু মানুহক ফোন কৰিলো। নলবাৰীৰ পুৰণি কথা জনা মানুহকো সুধিলো। কোনেও সুকৃতিৰ কথা নাজানে। নিজ পকোৱালৈ গৈ আহিছো। বহু মানুহক সুধিলো। সুকৃতি চৌধুৰীক চিনি পোৱা কোনো এজনো মানুহ নাপালো। হেড অফিচৰ পৰা কৈছিল ছোৱালীজনীৰ দেউতাকক হেনো আলফাই মাৰিছিল। কিন্তু আলফাৰ হাতত নিহত কোনো মানুহৰে ছোৱালীয়ে জাপানত ডাক্টৰী কৰি থকাৰ খবৰ নাপালো। শেষত অফিচত ফোন কৰি নহ’ব বুলি হাত দাঙি দিলো।’-এইদৰে কয় গুৱাহাটীৰ পৰা সম্প্ৰচাৰিত এটা জনপ্ৰিয় নিউজ পৰ্টেলৰ জনৈক বৰ্মন উপাধিৰ এগৰাকী সাংবাদিকে।

সুকৃতিৰ জীৱন-মৃত্যুক লৈ ৰহস্য

দুপৰীয়াৰ ভাগলৈকে সুকৃতিৰ মৃত্যুত শোকত ভাগি পৰা অসমৰ নেটিজেনসকলৰ মনোজগত হঠাৎ সলনি হ’বলৈ আৰম্ভ কৰিছিল। কোনো স্মৃতি সভা নালাগে বুলি কোৱা সুদূৰ জাপানত থকা অসমীয়া ছোৱালীজনীৰ জীৱনৰ বিষয়ে আন একো তথ্য নাপাই ভিন্নজনৰ মনত উদয় হ’বলৈ লৈছিল ভিন্ন প্ৰশ্ন। কম সময়ৰ ভিতৰতে জনপ্ৰিয় হৈ পৰা এগৰাকী সুলেখিকা তথা চিকিৎসক। তাৰপিছতো তেওঁৰ বিষয়ে কোনোৱে বিতঙকৈ একোৱেই নাজানে। এই নজনাখিনিয়েই যেন দিবলৈ আৰম্ভ কৰিছিল বহু প্ৰশ্নৰ উত্তৰ। 

অমৰেন্দ্ৰ ডেকা নামৰ এজন ফেচবুক ইউজাৰে এই লৈ প্ৰশ্ন কৰিছিল, 'ডঃ সুকৃতি চৌধুৰী কি সঁচাকৈয়ে এটা myth? ডঃ সুকৃতি চৌধুৰীক ব্যক্তিগত ভাবে কোনে কোনে লগ পাইছে? মই virtual world ৰ কথা কোৱা নাই। কায়িক ভাবে লগ পোৱা কোনোবা আছে নেকি মোৰ বন্ধু তালিকাত? শৈশৱত, কৈশোৰত, স্কুল অথবা কলেজীয়া জীৱনত? বিগত কেইবাটাও বর্ষত চিকিৎসক হৈ ওলোৱা বহু বন্ধু বান্ধৱী মোৰ আছে। তেওঁলোকৰ কোনোবাই? আশ্চৰ্যকৰ!!!’


সুকৃতিৰ নামত ভাইৰেল হৈ পৰা ফটোখন

সুকৃতিৰ মৃত্যুক লৈ শোক চৰ্চা চলি থকাৰ সময়তে দেৱব্ৰত গগৈ নামৰ আন এজন ফেচবুক ইউজাৰে দুপৰীয়াৰ ভাগতে কথাবোৰক লৈ সন্দেহ ব্যক্ত কৰি এটি পোষ্ট কৰিছিল। তেওঁৰ পোষ্টটোক লৈ একাংশ সুকৃতিৰ অনুৰাগীয়ে আপত্তিয়ো দৰ্শাইছিল। তেওঁ লিখিছিল, 'জাপানত কৰ্মৰত চিকিৎসক ডাক্তৰ সুকৃতি চৌধুৰীৰ মৃত্যুৰ খৱৰ আজি পুৱাৰে পৰা প্ৰায় বিছজনমান মানুহে পষ্ট কৰিছে। ইয়াৰ আগতে তেখেতৰ বিষয়ে মই একো জনা নাছিলো। পষ্টবোৰত লিখা মতে তেখেত এগৰাকী মানৱদৰদী আৰু সুলেখিকা আছিল আৰু জন্মসূত্ৰে তেখেত নলবাৰীৰ হয় বুলি গম পাইছো। ইমান এগৰাকী ভাল মানুহৰ বিষয়ে আগতে নজনাৰ বাবে বেয়া লাগিছে। তেখেতৰ বিষয়ে জানিবলৈ বিচাৰি তেখেতৰ ফেচবুক প্ৰফাইলটো চাই বিফল হলো কাৰণ প্ৰফাইলটো লকড। কোনোবাই এইগৰাকী সুলেখিকাৰ বিষয়ে সবিশেষ জনাব নেকি? অৱশ্যে মই তেখেতৰ লেখা আজিলৈকে এটাও পঢ়া নাই। তেখেতৰ নলবাৰীৰ ঘৰখনৰ বিষয়েও অলপ জানিবলৈ মন গৈছে। তেখেতৰ কেতিয়া মৃত্যু হ'ল আৰু সেই মৃত্যুৰ বতৰা প্ৰথমে কোনে কেনেকৈ পালে কোনোবাই জানে নেকি? চিকিৎসক সুকৃতি চৌধুৰীক কায়িকভাবে লগ পোৱা বা তেখেতৰ লগত ফোনত কথা পতা কোনোবাই আমাক সৱিশেষ এই বিষয়ে জনালে কৃতজ্ঞ হ'ম।’

অৱশেষত ৰহস্যৰ অৱসান...

প্ৰায় ১২ ঘণ্টাৰ এক শ্বাসৰুদ্ধকৰ ছ’চিয়েল মিডিয়াৰ জীৱন। সুকৃতিক লৈ সকলোৰে মাজত বাঢ়ি গৈছিল উৎকণ্ঠা। তেনেতে ফেচবুকৰ এটা বিশেষ পোষ্টে দৃষ্টি কাঢ়িছিল সকলোৰে। পোষ্টটো আওপকীয়া আছিল যদিও তাতেই যেন আছিল সকলো কথা। এই পোষ্টটো কৰিছিল ৰাজ্যখনৰ এগৰাকী বিশিষ্ট গল্পকাৰ তথা জ্যেষ্ঠ সাংবাদিক মনোজ গোস্বামীয়ে। 

নিশা প্ৰায় ৮ বজাত আপলোড কৰা পোষ্টটোত গোস্বামীয়ে লিখিছিল, 'লিখি লিখি আমনি লগাত the final problem গল্পত ছাৰ্লক হোমছক হত্যা কৰিছিল স্বয়ং স্ৰষ্টা আৰ্থাৰ কনান দয়েলে। Three Masketeers ক্ৰমাগত সফলতাত ভাগৰ লগাত এজন এজনকৈ তিনিওজন মস্কেটিয়াৰ্ছক নিজ হাতেৰে মাৰি পেলাইছিল আলেকজেণ্ডাৰ দুমাই। সাহিত্যত killing off বুলি এটা বস্তু আছে।’

এই পোষ্টটোৰ পিছতেই অৱসান ঘটিছিল সকলো ৰহস্যৰ। পুৱাৰ পৰা সুকৃতি চৌধুৰীৰ মৃত্যুৰ শোকত ভাগি পৰা প্ৰতিজন নেটিজেন এইবাৰ হৈ পৰিছিল হতবাক। সঁচাকৈয়ে এনে হ’ব পাৰেনে? সঁচা সঁচা যেন লাগি থকা এগৰাকী মানুহ আচলতে তেজ-মঙহৰ নাছিল? সঁচা বুলি ভাবি থকা, সমাজ সলনিৰ সপোন দেখা, মানৱতাৰ কথা কোৱা পাগলাদিয়াৰ পৰা জাপানৰ ওছাকালৈ যোৱা মানৱ দৰদী তেনেই কম বয়সীয়া ট্ৰেজিক কাহিনীৰে ভৰি থকা জীৱনৰ গৰাকী চিকিৎসকৰগৰাকী আচলতে এটি কাল্পনিক চৰিত্ৰহে আছিল?

সুকৃতিৰ ভাইৰেল হৈ পৰা ফটোখনৰ প্ৰকৃত গৰাকী কোন?

গল্পকাৰ মনোজ গোস্বামীৰ পোষ্টটোৰ কিছু সময় পূৰ্বে ডিএক্টিভেট হৈ পৰিছিল সুকৃতি চৌধুৰীৰ লকড ফেচবুক প্ৰফাইলটো। ডিএক্টিভেট হৈ পৰিছিল ভিন্নজনে দাবী কৰি থকা সুকৃতিক ওচৰৰ পৰা লগ পোৱা তথা সুকৃতিৰ অভিভাৱক স্বৰূপ প্ৰাণ প্ৰতিম বৰুৱাৰ ফেচবুক একাউণ্টটো। তেনেতেই ভাস্কৰ বাপুকণ গগৈ নামৰ মনোজ গোস্বামীৰ মিচুৱেল ফেচবুক ফ্ৰেইণ্ড এজনে ইংৰাজীতে দিছিল এটা বিশেষ পোষ্ট।

পোষ্টটোত তেওঁ সুকৃতিৰ সত্য উদ্ঘাটনৰ বাবে ধন্যবাদ জনাইছিল গল্পকাৰ মনোজ গোস্বামীক। ইংৰাজীতে দিয়া পোষ্টটোত তেওঁ লিখিছে, 'মনোজ গোস্বামী ডাঙৰীয়াৰ অনুসন্ধানৰ কৌশলক ধন্যবাদ জনাইছো। এতিয়াহে জানিব পাৰিছো যে ওছাকাৰ সুকৃতি চৌধুৰীৰ দুখজনক কাহিনী আৰু মৃত্যুৰ খবৰ আচলতে মিছা। সুকৃতিৰ কথাবোৰে মোক একপ্ৰকাৰ কন্দুৱাই পেলাইছিল। কিন্তু আচল কথা এয়েই যে আচলতে সুকৃতি চৌধুৰী বাস্তৱত নাছিলেই। ক’ভিড কালত কেইজনমান ল’ৰাই এই প্ৰফাইলটো ক্ৰিয়েট কৰিছিল আৰু এতিয়া ক’ভিড শাম কটাত আকৌ চাকৰিত ব্যস্ত হ’বলগীয়া হোৱাত তেওঁলোকে চৰিত্ৰটোক হত্যা কৰাৰ সিদ্ধান্ত গ্ৰহণ কৰে।’

এই পোষ্টটোৰ কিছু সময় পিছতে ভাস্কৰ বাপুকণ গগৈ নামৰ একেজন ইউজাৰে এগৰাকী যুৱতীৰ সৈতে দুজন কম বয়সীয়া লোকে খাদ্য গ্ৰহণ কৰি থকা এখন বিশেষ ফটো পোষ্ট কৰিছে। ফটোখনৰ কেপশ্যনত লিখিছে, 'সুকৃতি চৌধুৰীৰ মৃত্যুৰ দুখত মা-দেউতাৰ সৈতে কিবা এটা খাবলৈ আহিছো।’ এই ফটোখনৰ তলত মনোজ গোস্বামীয়ে কমেণ্ট কৰিছে, 'তোমাৰ মা-দেউতা তেনেই ডেকা হৈ আছেহে!’ উক্ত কমেণ্টত গগৈয়ে আকৌ ৰিপ্লাই দি কৈছে, 'আচলতে তেওঁলোক সুকৃতিৰ মৃত্যুৰ শোকত ভাগি পৰিছে। তেওঁলোকে পাগলাদিয়ালৈ যাব বিচাৰিছে। মই কৈছো আগতে কিবা অলপ খাই লও আহা।’

লক্ষণীয় যে, ফেচবুক একাউণ্ট ডিএক্টিভেট কৰাৰ পূৰ্বে এখনো ফটো বিচাৰিবলৈ নোপোৱা সুকৃতি চৌধুৰীৰ নামত এখন ফটোও ভাইৰেল হৈ পৰিছিল। বহুতেই এই ফটোখনেই সুকৃতিৰ ফটো বুলি ভাবি সেয়া শ্বেয়াৰ কৰি শোক প্ৰকাশ কৰিছিল। হাতত কলম লৈ বিশেষ ভংগীমাৰে থকা ছোৱালীজনীৰ ফটোখন ৰিভাৰ্ছ ইমেচ ছাৰ্চ কৰিলেও বিচাৰি পোৱা নাযায়। অৰ্থাৎ এয়া স্পষ্ট যে সুকৃতিৰ নামত ভাইৰেল হৈ পৰা ফটোখন ইণ্টাৰনেটৰ পৰা লোৱা ফটো নহয়।


ৰহস্যৰ শেষত পোষ্ট কৰা ফটোখন...

ফেচবুকত এখনো ফটো পোষ্ট নকৰা সুকৃতিৰ নামত ভাইৰেল হৈ পৰা ফটোখন যদিহে ইণ্টাৰনেটৰ পৰা লোৱা ফটো নহয় তেন্তে এই ফটোখনৰ গৰাকী কোন? এই প্ৰশ্নটোৰ উত্তৰ যেন লুকাই আছে ভাস্কৰ বাপুকণ গগৈয়ে পোষ্ট কৰা বিশেষ ফটোখনতে। ফটোখনত থকা যুৱতীগৰাকীলৈ চালে স্পষ্টকৈ ধৰা পৰে যে সুকৃতি বুলি ভাইৰেল হৈ থকা ফটোখনৰ সৈতে এই ফটোখনত থকা যুৱতীগৰাকীৰ হুবহু মিল আছে। 

ফটোখনত থকা যুৱক দুজনৰ এজন হয়তো ভাস্কৰ বাপুকণ গগৈ আৰু আনজনে হয়তো ক্ৰিয়েট কৰিছিল সেই ৰহস্যময়ী ট্ৰেজিক কাহিনীৰে ভৰা ডাঃ সুকৃতি চৌধুৰীৰ সমগ্ৰ জীৱন বৃত্তান্ত থকা ফেচবুক প্ৰফাইল। লগতে এই প্ৰফাইলটোৰ পঢ়িলে আৰু পঢ়িবলৈ মন যোৱা প্ৰতিটো লেখাৰ আঁৰত হয়তো সংগোপনে আন এটা মূৰত আছিল অসমৰ এজন জনপ্ৰিয় গল্পকাৰ। অৱশেষত সেই গল্পকাৰজনেই ফেচবুকত কলেমেৰে হত্যা কৰিলে কম সময়ৰ ভিতৰতে অসমৰ প্ৰতিজন নেটিজেনৰ হৃদয় জয় কৰিবলৈ সমৰ্থ হোৱা ডাঃ সুকৃতি চৌধুৰীক। সঁচাকৈয়ে বাস্তৱ দুনীয়াৰ দৰেই এতিয়া যেন বিচিত্ৰ হৈ পৰিছে ছ’চিয়েল মিডিয়াৰ এই দুনীয়া! 

গল্পকাৰ মনোজ গোস্বামীৰ মানস কন্যা নেকি সুকৃতি?

দেওবাৰৰ গোটেই দিনটো সকলোৱে সুকৃতি পাগলাদিয়া পাৰৰ এগৰাকী তেজ-মঙহৰ ছোৱালী বুলিয়েই ধাৰণা কৰি লৈছিল। দুই-এজনে ইয়াক লৈ প্ৰশ্ন কৰিছিল যদিও সেই সম্পৰ্কে নিশ্চিত হব পৰা নাছিল। এনেদৰে দেওবাৰৰ দিনটো প্ৰতিজন নেটিজেনেই একপ্ৰকাৰ ৰহস্যৰ মাজত সোমাই পৰিছিল। কিন্তু প্ৰায় ১২ ঘণ্টাজোৰা সেই ৰহস্যাৰ যৱনিকা পৰিছিল গল্পকাৰ মনোজ গোস্বামীৰ ওপৰত উল্লেখ কৰা পোষ্টটোৰ পিছত। ইয়াৰ পিছতেই স্বাভাৱিকতে প্ৰশ্ন উত্থাপিত হৈছে  যে সুকৃতি চৰিত্ৰটোৰ আঁৰৰ মূল ব্যক্তিগৰাকী গল্পকাৰ মনোজ গোস্বামীয়েই নেকি? এই সন্দৰ্ভত গল্পকাৰগৰাকীৰ সৈতে NNOৰ তৰফৰ পৰা যোাগাযোগৰ চেষ্টা চলোৱা হৈছিল যদিও সবিশেষ স্পষ্টকৈ জানিব পৰা নগল।

অৱশ্যে গল্পকাৰ গোস্বামীৰ ফেচবুকৰ মিচুৱেল ফ্ৰেইণ্ড ভাস্কৰ পাপুকণ গগৈৰ শেহতীয়া ফেচবুক পোষ্টত যেন তাৰেই ইংগিত পোৱা গৈছে। পোষ্টটোত গগৈয়ে লিখিছে, 'সুকৃতি চৌধুৰীৰ স্ৰষ্টা নিশ্চয় এজন অতি উচ্চ খাপৰ লেখক। এক social experiment ৰ অন্ত পৰিল। স্ৰষ্টা কিন্তু এতিয়াও সুস্থ হৈয়ে আছে। নতুন সৃষ্টি নিশ্চয় আহিব পাঠকৰ মাজত। হয়টো নিজৰ নামত বা আন কোনো ছদ্মনামত। ইয়াত দুখ কৰিব লগীয়া একো নাই। এজন যাদুকৰৰ এক masterpiece illusion-ত বিভ্ৰান্ত হ’ল বহুজন।' উল্লেখ্য যে কভিড কালত ভাইৰাছ শীৰ্ষক এটি উচ্চমানৰ গল্প পাঠকসকলক উপহাৰ দিছিল 'এলুমিনিয়ামৰ আঙুলি'  'সমীৰণ বৰুৱা আহি আছে'ৰ দৰে মননশীল গল্পৰ স্ৰষ্টা মনোজ কুমাৰ গোস্বামীয়ে। সেয়ে ভাস্কৰ পাপুকণ গগৈয়ে উল্লেখ কৰা উচ্চ খাপৰ লেখকগৰাকীক বহুতেই গল্পকাৰ মনোজ গোস্বামী বুলিয়েই ধৰি লৈছে।

'আচলতে এয়া মনোজ গোস্বামীৰ দৰে লেখকৰেই সৃষ্টি হ'ব লাগিব। ছচিয়েল মিডিয়াৰ জৰিয়তে তেওঁ অসমীয়া সাহিত্যক লৈ এক সুন্দৰ সম্পৰীক্ষা চলাইছে। এয়া অসমৰ সাহিত্য জগতৰ বাবে এক ইউনিক খবৰ বুলিব পাৰি। ইয়াৰ আগতে কেইজনমানে মিলি মোমাই বৰুৱা নামৰ এটা ছচিয়েল মিডিয়াকেন্দ্ৰিক চৰিত্ৰ সৃষ্টি কৰিছিল। কিন্তু সুকৃতি চৌধুৰী তাৰ তুলনাত যথেষ্ট ব্যতিক্ৰম। ইয়াৰ সৈতে সাহিত্যৰ কথা জড়িত হৈ আছে। মানুহক বাদ দি সাহিত্য সৃষ্টি হব নোৱাৰে। সাহিত্যক বাদ দিও সমাজে ধাৰাবাহিকতা ৰক্ষা কৰিব নোৱাৰে। এয়া হৈছে সময়ৰ সৈতে খোজ মিলোৱা সাহিত্যৰ এক অনন্যা ৰূপ। ইয়াৰ আঁৰৰ প্ৰতিগৰাকী ব্যক্তি আচলতে ধন্যবাদৰ পাত্ৰ। হয়তো সোনকালেই ইয়াৰ সমস্ত ৰহস্য ভেদ হব আৰু সুকৃতি চৌধুৰী অসমীয়া সাহিত্যৰ এটি কালজয়ী চৰিত্ৰ হৈ পৰিব।'-NNOৰ আগত এইদৰে কয় নাম প্ৰকাশত অনিচ্ছুক মনোজ গোস্বামীৰ এগৰাকী সহযোগীয়ে।

সুকৃতিৰ আঁৰত আছে নেকি লেখক অৰ্ণৱজান ডেকা?

'সুকৃতি ছেনছেশ্যন'ৰ মাজতেই আন একাংশ নেটিজেনে আকৌ সুকৃতি চৰিত্ৰটোৰ আঁৰত লেখক, ঔপন্যাসিক অৰ্ণৱজান ডেকা থকাৰ সম্ভাৱনা ব্যক্ত কৰিছে। সুকৃতিৰ মৃত্যুৰ বাতৰি বিয়পি পৰাৰ সময়তেই এটি দীঘলীয়া পোষ্ট শ্বেয়াৰ কৰা দেখা গৈছে লেখক অৰ্ণৱাজান ডেকাক। সুকৃতিয়ে লিখা লেখা বুলি উল্লেখ কৰি সেয়া পোষ্ট কৰিছে ডেকাই। একেদৰে ডেকাই নিজৰ ফেচবুক একাউণ্টৰ প্ৰফাইল পিকচাৰত সুকৃতি বুলি ভাইৰেল হৈ পৰা ফটোখন লগাই থোৱাও দেখা গৈছে। অৰ্ণৱজান ডেকাৰ পোষ্টৰ তলত অধিকাংশই সুকৃতিৰ আঁৰত তেঁৱেই আছিল বুলিও দাবী কৰা দেখা গৈছে। 

ডেকাৰ পোষ্টত এজনে কমেণ্ট কৰিছে এইদৰে, 'এই একাউণ্টৰ মালিক অন্তত: এজন অৰ্ণৱজান ডেকাই হয়। যিকোনো লেখাৰ আৰম্ভণিতে নিজৰ বা পৰিয়ালৰ বিষয়ে দীঘলীয়াকৈ লিখাটো ডেকাৰ অভ্যাস। যিটো সুকৃতিৰ লিখাখিনিৰ সৈতে মিল আছে। প্ৰথম পেৰাগ্ৰাফটোৰ বাক্যগাঁথনি, লিখনশৈলী সম্পূৰ্ণ ডেকাৰ সৈতে একে। ১৯৯৪ জন্ম ছোৱালী এজনীয়ে যাদৱ ডায়েৰীৰ চাহৰ কথা ইমান নষ্টালজিক হৈ নিলিখে। এজন বয়সীয়া মানুহে লিখিব। গতিকে এই একাউণ্টৰ এজন চালক অন্ততঃ ডেকাই হয়।’

এনেদৰে এতিয়া সুকৃতি নামৰ কোনো প্ৰকৃততে নাছিল বুলি চৰ্চা চলি থকাৰ মাজতে ইয়াৰ আঁৰত কোন আছিল আৰু সুকৃতি চৰিত্ৰটো কাৰ মানস কন্যা তাক লৈ আন এক চৰ্চা চলা দেখা গৈছে। অৱশ্যে এই  প্ৰতিবেদন যুগুতোৱা পৰ্যন্ত ছচিয়েল মিডিয়াত অসমৰ নেটিজেনসকলৰ মাজত সুকৃতিক লৈ অব্যাহত আছে ৰহস্য আৰু চাঞ্চল্য।