কথা দিছিল নিজেও নোখোৱাৰ আৰু আনকো খাবলৈ নিদিয়াৰ। ২০১৪ চনৰ লোকসভা নিৰ্বাচনৰ প্ৰচাৰত প্ৰতিশ্ৰুতিৰে ভৰা এই শ্লোগান দিয়েই ক্ষমতালৈ আহিছিল নৰেন্দ্ৰ মোদী। কিন্তু বিগত ১০ বছৰত বাৰাম্বাৰ অভিযোগ উত্থাপন হৈছে যে মোদীয়ে যি প্ৰতিশ্ৰুতি তেওঁৰ প্ৰথমটো কাৰ্যকালৰ পূৰ্বে দিছিল, সেয়া তেওঁ পূৰণ কৰা নাই। প্ৰধানমন্ত্ৰী মোদীয়ে দুৰ্নীতিৰ বিৰুদ্ধে শূন্য সহনশীলতাৰ পদ্য মাতিলেও বাস্তৱত বাৰে বাৰে দুৰ্নীতিৰে সংগ দিছে, দুৰ্নীতিগ্ৰস্ত নেতা-পালিনেতাক বিজেপিৰ ‘ৱাশ্বিং মেছিন’ত ধুই নিকা কৰি আঁকোৱালি লৈছে।

শেহতীয়াকৈ উচ্চতম ন্যায়ালয়ৰ নিৰ্দেশ পালন কৰি এছবিআইয়ে প্ৰকাশ কৰা ইলেক্ট’ৰেল বণ্ডৰ তথ্যই পোহৰলৈ আনিছিল কিদৰে দেশত চান্দা লৈ ধান্দা প্ৰদানৰ সংস্কৃতি গঢ়ি তোলা হৈছে। ইডি-চিবিআই আদিৰ দৰে তদন্তকাৰী সংস্থাৰ সহায়ত ভীতিগ্ৰস্ত কৰি বৰ বৰ কোম্পানীৰ পৰা চান্দা সংগ্ৰহ কৰাৰ বহু বিস্ফোৰক তথ্যও শেহতীয়াকৈ চৰ্চিত হৈছে। প্ৰধানমন্ত্ৰী মোদী আৰু বিজেপিক শ’লঠেকত পেলোৱা এনে চৰ্চা আৰু বিস্ফোৰক অভিযোগৰ মাজতে এইবাৰ শাসকীয় দলটোৰ ভিতৰত উত্তেজনা বৃদ্ধি কৰিছে ৰাষ্ট্ৰীয় সংবাদ সংস্থা 'দ্য ইণ্ডিয়ান এক্সপ্ৰেছ’ৰ এক প্ৰতিবেদনে।

যোৱা ৭ এপ্ৰিলত ইণ্ডিয়ান এক্সপ্ৰেছে প্ৰকাশ কৰা এক প্ৰতিবেদনত বিগত ১০ বছৰত অন্য দলৰ পৰা বিজেপি বা এনডিএ মিত্ৰজোঁটত চামিল হৈ দুৰ্নীতি আৰু কেলেংকাৰীৰ তামাম অভিযোগৰ পৰা মুক্ত হোৱা ২৫ জন নেতাৰ নাম উল্লেখ কৰা হৈছে। মন কৰিবলগীয়া যে, বিগত বছৰবোৰত বিৰোধীয়ে বাৰে বাৰে অভিযোগ কৰি আহিছে যে বিজেপিৰ ওচৰত এনে এক ৱাশ্বিং মেছিন আছে, যাৰ জৰিয়তে সকলো দুৰ্নীতিৰ অভিযোগ আৰু তদন্তকাৰী সংস্থাৰ হাতোৰাৰ পৰা নিজকে দাগমুক্ত কৰিব পাৰি।  যিসকল বিৰোধী নেতাক মোদী বাহিনীয়েই দুৰ্নীতিগ্ৰস্ত বুলি অভিহিত কৰি আহিছে, তেওঁলোকেই পৰৱৰ্তী সময়ত এই ৱাশ্বিং মেছিনত সোমাই বিজেপিৰ আস্থাভাজন হৈ মুখ্যমন্ত্ৰী, মন্ত্ৰী বা কোনো বিভাগৰ গুৰুত্বপূৰ্ণ পদবী লাভ কৰিবলৈ সক্ষম হয়। 

ইণ্ডিয়ান এক্সপ্ৰেছৰ প্ৰতিবেদনে বিজেপিৰ বঢ়াইছে উত্তেজনা
 
দেশৰ আগশাৰীৰ ইংৰাজী বাতৰি কাকত 'দ্য ইণ্ডিয়ান এক্সপ্ৰেছ'ৰ প্ৰতিবেদনখনত প্ৰকাশ পোৱা মতে ২০১৪ চনৰ পৰা ২০২৪ চনলৈকে অৰ্থাৎ যোৱা ১০ বছৰত দুৰ্নীতিগ্ৰস্ত আখ্যা পোৱা ২৫ জনকৈ নেতাৰ ২৩ জনেই বিজেপিৰ ৱাশ্বিং মেচিনত সোমাই নিজকে নিকা কৰি লৈছে। দুৰ্নীতিৰ অভিযোগত অভিযুক্ত এই নেতাসকলে বিজেপিত যোগ দিয়াৰ পিছতে তেওঁলোকৰ বিৰুদ্ধে থকা গোচৰসমূহ হয় উঠাই লোৱা হৈছে, অথবা স্থগিত ৰখা হৈছে। প্ৰতিবেদনত উল্লেখ কৰা তথ্যত দেখা গৈছে যে ৩ জন নেতাৰ বিৰুদ্ধে থকা গোচৰ সম্পূৰ্ণৰূপে উঠাই লোৱা হৈছে। বাকী ২০ জন নেতাৰ বিৰুদ্ধে থকা পূৰ্বৰ গোচৰসমূহ বিজেপিত যোগ দিয়াৰ পিছতে বিভিন্ন তদন্তকাৰী সংস্থাসমূহে স্থগিত ৰাখিছে। 

ভ্ৰষ্টাচাৰৰ বিৰুদ্ধে নিৰৱিচ্ছিন্ন যুদ্ধ অব্যাহত থাকিব বুলি প্ৰধানমন্ত্ৰী নৰেন্দ্ৰ মোদীয়ে পুনৰ নতুনকৈ শ্ল’গান দিবলৈ আৰম্ভ কৰাৰ সময়তে প্ৰকাশ পোৱা প্ৰতিবেদনে এতিয়া বিজেপিৰ ঘোৰ সমৰ্থকসকলকো চিন্তিত কৰি তুলিছে। উল্লেখ্য যে পূৰ্বৰে পৰা বিৰোধী দলসমূহে বিজেপিক ৱাশ্বিং মেচিন আখ্যা দি আহিছিল যদিও তেনে বাতৰিয়ে সংবাদ শিৰোনাম কমেই দখল কৰিছিল আৰু বাতৰি হিচাপে প্ৰকাশ পালেও গুৰুত্বসহকাৰে প্ৰকাশ পোৱা নাছিল। কিন্তু 'ইণ্ডিয়ান এক্সপ্ৰেছ’ৰ বুধবাৰৰ সংখ্যাত বিজেপিৰ ৱাশ্বিং মেচিনত সোমাই নিকা হৈ পৰা ২৫ জনকৈ নেতাৰ কাহিনী সবিস্তাৰে প্ৰকাশ পোৱাত ছ’চিয়েল মিডিয়াতো তোলপাৰ লাগিছে। 

বিজেপিলৈ আহি দুৰ্নীতিৰ দাগ আঁতৰোৱা নেতাসকলৰ ভিতৰত ১০ জন হৈছে কংগ্ৰেছৰ। তালিকাখনত কংগ্ৰেছ এৰি বিজেপিলৈ গৈ অসমৰ মুখ্যমন্ত্ৰীৰ আসনত অধিষ্ঠিত হোৱা ড০ হিমন্ত বিশ্ব শৰ্মাৰ নামো আছে। কংগ্ৰেছৰ এই নেতাসকলৰ উপৰিও এনচিপি আৰু শিৱসেনাৰ ৪ জনকৈ নেতা, তৃণমূল কংগ্ৰেছৰ ৩ জন নেতা, তেলেগু দেশম পাৰ্টিৰ ২ জন নেতা আৰু সমাজবাদী পাৰ্টী আৰু ৱাইএছআৰ কংগ্ৰেছৰ ১ জনকৈ নেতাই বিজেপিৰ ৱাশ্বিং মেচিনৰ জৰিয়তে 'অচ্ছে দিন’ৰ সোৱাদ লাভ কৰিছে। ইয়াৰে প্ৰায় ৬ জনকৈ নেতাই লোকসভা নিৰ্বাচনৰ দিন ঘোষণা কৰাৰ প্ৰায় এসপ্তাহ পূৰ্বে পূৰ্বৰ দল এৰি বিজেপিত যোগ দিছে। 

ইণ্ডিয়ান এক্সপ্ৰেছৰ বাতৰিটোত প্ৰকাশ পোৱা মতে ২০১৪ চনৰ পৰা এতিয়ালৈ দেশৰ যিমান আগশাৰীৰ লোকৰ বিৰুদ্ধে ইডি অথবা চিবিআইয়ে অনুসন্ধান আৰম্ভ কৰিছে সেইসকলৰ ভিতৰত ৯৫ শতাংশই হৈছে বিৰোধী দলৰ নেতা। আনহাতে এনে অনুসন্ধান অধিক দেখা গৈছে ২০২২-২৩ চনত ৰাজনৈতিক উত্থান-পতনৰ সাক্ষী হৈ ৰোৱা মহাৰাষ্ট্ৰত। চিবিআই আৰু ইডিৰ একাধিক অভিযানৰ পিছতে উক্ত সময়ছোৱাত ৰাজ্যখনত মহাবিকাশ অঘাড়ী চৰকাৰৰ পতন ঘটাৰ লগতে শিৱসেনা আৰু এনচিপি দল দুটাত বিভাজনে দেখা দিয়ে। তাৎপৰ্যপূৰ্ণ কথা এয়ে যে এনচিপিত বিভাজন হোৱাৰ পিছতে এনডিএত চামিল হোৱা এনচিপি নেতা অজিত পাৱাৰ আৰু প্ৰফুল পেটেলৰ বিৰুদ্ধে থকা গোচৰ উঠাই লোৱা হৈছে। 

বিজেপিৰ ৱাশ্বিং মেছিনে কাক কিমান কৰিলে নিকা?

নেশ্যনেল স্পট এক্সচেঞ্জ লিমিটেড (এন এছ ই এল)ত সংঘটিত হোৱা জালিয়াতিৰ অভিযোগত শিৱসেনাৰ মুখপাত্ৰ প্ৰতাপ শাৰণিকৰ বিৰুদ্ধে ইডিৰ অভিযান আৰম্ভ হৈছিল। ২০২০ চনত বি ডব্লিউ অ’ৰ এক এজাহাৰৰ ভিত্তিত শাৰণিকৰ বিৰুদ্ধে তদন্ত আৰম্ভ কৰি ইডিয়ে একাধিক বাৰ শাৰণিকৰ বাসগৃহত অভিযান চলায়। কিন্তু ২০২২ চনত শিণ্ডেৰ সৈতে শাৰণিককে এনডিএত চামিল হোৱাৰ পিছতে শাৰণিকৰ বিৰুদ্ধে চলি থকা সকলো গোচৰৰ তদন্ত আকস্মিকভাৱে স্তব্ধ হৈ পৰে। এতিয়া প্ৰতাপ শাৰণিক বিজেপিৰ সহযোগী, সেয়ে তেওঁৰ বিৰুদ্ধে যদিও এতিয়াও গোচৰ চলি আছে, কিন্তু তদন্তৰ গতি অত্যন্ত লেহেমীয়া হৈ পৰা পৰিলক্ষিত হয়।

একেদৰে মহাৰাষ্ট্ৰৰ আন এজন নেতা হাছান মুশ্ৰিফৰ বিৰুদ্ধেও কলহাপুৰ মহাৰাষ্ট্ৰৰ সৰ সেনাপতি সান্তজী ঘোৰপাড়ে চেনি কাৰখানাত সংঘটিত হোৱা কেলেংকাৰীৰ অভিযোগৰ তদন্ত চলাই আছিল ইডিয়ে। ২০২৩ৰ ফেব্ৰুৱাৰী-মাৰ্চত এই গোচৰত তিনিবাৰকৈ মুশ্ৰিফৰ চৌহদত অভিযান চলায় ইডিয়ে। কিন্তু একে বছৰৰে জুলাই মাহত অজিত পাৱাৰৰ সৈতে হাছান মুশ্ৰিফে এনডিএত চামিল হোৱাত তেওঁৰ বিৰুদ্ধে তদন্তৰ গতি লেহেমীয়া হৈ পৰে।  ভাৱনা গাৱলিৰ বিৰুদ্ধেও ২০২০ চনৰ ধন সৰবৰাহৰ সৈতে জড়িত গোচৰৰ তদন্ত চলাই থকা হৈছিল। শিৱসেনাৰ সাংসদগৰাকীৰ বাসগৃহত ২০২১ চনত কেইবাবাৰো অভিযান চলায় তদন্তকাৰী সংস্থাই। পৰৱৰ্তী সময়ত  তেওঁ এন ডি এত চামিল হোৱাত তেওঁৰ বিৰুদ্ধে অব্যাহত থকা গোচৰৰ তদন্তৰ গতি স্থবিৰ হৈ পৰে। 

পঞ্জাৱৰ প্ৰাক্তন মুখ্যমন্ত্ৰী কেপ্তেইন অমৰিন্দৰ সিঙৰ পুত্ৰ ৰানিন্দৰ সিঙৰ বিৰুদ্ধে আই টি তদন্তৰ সৈতে জড়িত ফেমা উলংঘাৰ অভিযোগত তদন্ত চলি আছে। এই গোচৰত ২০২০ চনৰ নৱেম্বৰত ৰানিন্দৰ সিঙৰ জেৰা চলায় ইডিয়ে। কিন্তু ইয়াৰ এটা বছৰ পিছত অৰ্থাত্ ২০২১ৰ নৱেম্বৰত পিতৃ অমৰিন্দৰ সিঙে কংগ্ৰেছ ত্যাগ কৰি বিজেপিৰ শৰণাপন্ন হোৱাৰ পিছতে স্থবিৰ হৈ পৰে পুত্ৰৰ বিৰুদ্ধে চলি থকা গোচৰৰ তদন্ত। 

বিজেপিৰ ৱাশ্বিং মেছিনত ধুই বে-দাগ হোৱা আন এটা উদাৰহণ হৈছে চি এম ৰমেশ। তেলেগু দেশম পাৰ্টীৰ সাংসদগৰাকীৰ বিৰুদ্ধে ২০১৮ চনত আই টি বিভাগে ১০০ কোটি টকাৰ অনিয়মৰ অভিযোগ উত্থাপন কৰি তদন্ত চলায়। সেই সময়ত টিডিপিৰ নেতাগৰাকীৰ একাধিক স্থানত তালাচী অভিযানো চলোৱা হয়।  কিন্তু ২০১৯ চনৰ জুন মাহত তেওঁ বিজেপিত যোগদান কৰে আৰু ইয়াৰ পিছতে তেওঁৰ  বিৰুদ্ধে উত্থাপিত অভিযোগ স্তব্ধ হৈ পৰে। 

News Next One হৈছে 'Crowdfunding’ৰ জৰিয়তে পৰিচালিত নিউজ ৱেবছাইট। প্ৰতিদিনে একাধিক তথ্যসমৃদ্ধ তথা অনুসন্ধানমূলক বিতং বাতৰি প্ৰকাশ কৰিবলৈ আমাক প্ৰয়োজন মাহে ৫০ হাজাৰ টকাৰ। কিন্তু এতিয়া আমি শুভকাংক্ষীসকলৰ পৰা প্ৰতিমাহে সৰ্বমুঠ ১০-১২ হাজাৰ টকাকৈহে দান-বৰঙণি লাভ কৰিছো। ফলত আমি প্ৰতিদিনে মাত্ৰ এটা বাতৰিহে প্ৰকাশ কৰিবলৈ সমৰ্থ হৈছো। অনাগত সময়ত ৰাইজৰ স্বাৰ্থত আৰু অধিক বাতৰি প্ৰকাশ কৰিব পৰাকৈ আমি পঢ়ুৱৈসকলৰ পৰা সঁহাৰি লাভ কৰিব পাৰিম বুলি আশাবাদী। তলৰ ফটোখনত ক্লিক কৰি আমাক সাধ্যানুযায়ী সহায় কৰক।

Click to Read ►অনুগ্ৰহ কৰি আমাক 'বন্ধ হৈ পৰা' অথবা 'বিক্ৰী যাবলগীয়া' হোৱাৰ পৰা ৰক্ষা কৰক!

প্ৰধানমন্ত্ৰী নৰেন্দ্ৰ মোদীৰ দুৰ্নীতি বিৰোধী যুঁজৰ সত্যতা উদঙাই আজি পশ্চিমবংগ বিজেপিৰ অন্যতম প্ৰধান নেতা হিচাপে পৰিগণিত হৈছে এসময়ত নাৰদ ষ্টিং অপাৰেচন গোচৰৰ অভিযুক্ত শুভেন্দু অধিকাৰী। একালৰ তৃণমূল কংগ্ৰেছৰ নেতা তথা বৰ্তমানৰ পশ্চিম বংগৰ বিৰোধী দলৰ নেতা শুভেন্দু অধিকাৰী আন ১১জন নেতাৰ সৈতে নাৰদ ষ্টিং অপাৰেচন গোচৰৰ অভিযুক্ত হিচাপে ২০১৭ চনত এফআইআৰত উল্লেখ কৰিছিল চিবিআইয়ে। ইয়াৰ পিছতে এই গোচৰৰ তদন্তৰ বাবে ২০১৯ৰ এপ্ৰিলত লোকসভাৰ অধ্যক্ষৰ পৰা অনুমোদন বিচাৰে চিবিআইয়ে।  কিন্তু লোকসভাৰ অধ্যক্ষৰ অনুমোদনৰ পূৰ্বেই ডিচেম্বৰ, ২০২০ত অধিকাৰীয়ে বিজেপিত যোগদান কৰাত আজিও অধ্যক্ষৰ অনুমোদনৰ বাবে অপেক্ষা কৰিছে চিবিআইয়ে।

একেদৰে সমাজবাদী পাৰ্টীৰ সঞ্জয় ছেঠ, ৱাইএছআৰচিপিৰ কে গীতা, শোভন চেটাৰ্জী, চগন ভুজবল, কৃপাশংকৰ সিং, দিগম্বৰ কামাত, অশোক চৌহান, নবীন জিন্দাল, মধু কোডা, বাবা চিদ্দিকী, জ্যোতি মিৰ্ধা, তাপস ৰয়, অৰ্চনা পাটিল, গীতা কোডা আদি অনেক উদাহৰণ আছে যাক এসময়ত স্বয়ং বিজেপিয়েই দুৰ্নীতিগ্ৰস্ত আখ্যা দিছিল। তেওঁলোকৰ বিৰুদ্ধে বিভিন্ন গোচৰত ইডি, আইটি, চিবিআইৰ দৰে তদন্তকাৰী সংস্থাই তদন্ত চলাই আছে। কিন্তু বিজেপি বা বিজেপি মিত্ৰজোঁটত যোগদান কৰাৰ পিছতে এনেসকল নেতাৰ বিৰুদ্ধে এতিয়া হয় গোচৰ উঠাই লোৱা হৈছে অন্যথা তদন্ত স্থবিৰ হৈ পৰিছে। 

কোন দলৰ কোন কোন নেতা সোমাল ৱাশ্বিং মেচিনত?

কংগ্ৰেছ এৰি বিজেপিত যোগ দিয়া দুৰ্নীতিৰ অভিযোগত অভিযুক্ত ১০ গৰাকী নেতা হৈছে হিমন্ত বিশ্ব শৰ্মা, ৰানিন্দৰ সিং, কৃষ্ণশংকৰ সিং, গোৱাৰ প্ৰাক্তন মুখ্যমন্ত্ৰী দিগম্বৰ কামাত, মহাৰাষ্ট্ৰৰ প্ৰাক্তন মুখ্যমন্ত্ৰী অশোক চাৱন, নবীন জিন্দাল, অৰ্চনা পাটিল, গীতা কোডা, বাবা ছিদ্দিকী আৰু জ্যোতি মিৰ্ধা।

এনডিএৰ পক্ষ লোৱা এনচিপিৰ দুৰ্নীতিগ্ৰস্ত বুলি এসময়ত বিজেপিয়ে দাবী কৰি অহা ৪ নেতা হৈছে অজিত পাৱাৰ, প্ৰফুল্ল পেটেল, ছগন ভুজবাল আৰু হাছান মুছৰিফ। শিৱসেনাৰ ৪ নেতা যমিনি জাধৱ, যশৱন্ত জাধৱ, ভৱন গাৱালী আৰু প্ৰতাপ সাৰ্নাইকৰ বিৰুদ্ধেও দুৰ্নীতিৰ অভিযোগ আছিল আৰু এতিয়া তেওঁলোক এনডিএৰ পক্ষত। 

বিজেপিৰ ৱাশ্বিং মেচিনত সোমাই নিকা হোৱা তৃণমূল কংগ্ৰেছৰ ৩ নেতা হৈছে শুভেন্দু অধিকাৰী, তাপস ৰায় আৰু শোভেন চেটাৰ্জী। এই তালিকাত থকা তেলেগু দেশম পাৰ্টীৰ ২ নেতা হৈছে সুজানা চৌধুৰী আৰু চিএম ৰমেশ। তালিকাত আন নেতা দুগৰাকী হৈছে সঞ্জয় ছেঠ আৰু কে গীতা। সঞ্জয় ছেঠ সমাজবাদী দলৰ আৰু কে গীতা হৈছে ৱাইএছআৰ কংগ্ৰেছৰ নেতা।

গোচৰ প্ৰত্যাহাৰ, পালে পদবী

বিজেপিৰ ৱাশ্বিং মেচিনত সোমোৱা একালৰ দাগী নেতাসকলৰ ভিতৰত অসমৰ নেতা হিমন্ত বিশ্ব শৰ্মাই মুখ্যমন্ত্ৰীৰ দৰে আকৰ্ষণীয় পদবী লাভ কৰিবলৈ সমৰ্থ হৈছে। শৰ্মাৰ বিৰুদ্ধে ২০১৪ আৰু ২০১৫ চনত চিবিআই আৰু ইডিয়ে সাৰদা ছীট ফাণ্ড কেলেংকাৰী আৰু লুইজ বাৰ্জাৰ কেলেংকাৰীত জড়িত থকাৰ অভিযোগ উত্থাপন কৰিছিল বিজেপিয়ে। শৰ্মাৰ বিৰুদ্ধে আনকি ২০১৪ চনৰ লোকসভা নিৰ্বাচনত বিজেপিয়ে সংবাদমেল পাতি পুস্তিকা প্ৰকাশ কৰি চৰকাৰ গঠনৰ পিছতেই জেললৈ পঠিওৱা হ’ব বুলিও ঘোষণা কৰিছিল। ২০১৪ চনত কেন্দ্ৰত মোদী চৰকাৰ গঠন হোৱাৰ পিছতে ড০ শৰ্মাৰ বাসগৃহ আৰু কাৰ্যালয়ত চিবিআইয়ে অভিযান চলোৱাৰ লগতে কেবাবাৰো সোধ-পোছো কৰিছিল। অৱশেষত ২০১৫ চনত শৰ্মাই বিজেপিত যোগ দিয়ে আৰু বিজেপিৰ ৱাশ্বিং মেচিনৰ জৰিয়তে নিকা হৈ বৰ্তমান অসমৰ মুখ্যমন্ত্ৰীৰ আসনত অধিষ্ঠিত হ’বলৈ সমৰ্থ হৈছে। 

একেদৰে অজিত পাৱাৰৰ বিৰুদ্ধে ৭০ হাজাৰ কোটি টকাৰ কেলেংকাৰীৰ অভিযোগ থকা বুলি স্বয়ং প্ৰধানমন্ত্ৰীয়ে ভাষণত দাবী কৰি আহিছিল যদিও এনডিএত চামিল হোৱাৰ পিছতে পাৱাৰক মহাৰাষ্ট্ৰৰ উপ-মুখ্যমন্ত্ৰীৰ আসনত অধিষ্ঠিত কৰায় বিজেপিয়ে। শেহতীয়াকৈ কয়লা কেলেংকাৰিত জড়িত থকা বুলি বিজেপিয়ে দাবী কৰি অহা কংগ্ৰেছ নেতা নবীন জিন্দালক বিজেপিত যোগ দিয়াৰ এঘণ্টা পিছতে দলটোৱে লোকসভা নিৰ্বাচনত টিকট প্ৰদান কৰা দেখা গৈছে। এনেদৰে এতিয়া একপ্ৰকাৰ দুৰ্নীতিপৰায়ণ নেতাৰ শেষ আশ্ৰয়স্থলস্বৰূপ হৈ পৰিছে ২০১৪ত ‘না খাউংগা, না খানে দুংগা’ৰ হৰ্ডিঙেৰে দেশৰ অলি-গলি ভৰাই পেলোৱা মোদী আৰু শ্বাহৰ দল বিজেপি।

গোচৰ লেহেমীয়া হোৱাক লৈ কি কয় ইডি-চিবিআইয়ে?

প্ৰতিবেদনত প্ৰকাশ পোৱা অনুযায়ী  বিজেপিৰ ৱাশ্বিং মেচিনৰ স্পৰ্শ লাভ কৰা ২৫ জনীয়া নেতাৰ তালিকাত থকা ১২ জন নেতাই হৈছে মহাৰাষ্ট্ৰৰ। ইয়াৰে ১১ জনেই ২০২২ চনৰ ৩ জানুৱাৰীৰ পিছত বিজেপিত যোগ দিছে। মহাৰাষ্ট্ৰৰ ১২ জন নেতাৰ ভিতৰত কংগ্ৰেছ, শিৱসেনা আৰু এনচিপি এই প্ৰতিটো দলৰে ৪ জনকৈ নেতা আছে। 

এই সন্দৰ্ভত চিবিআই আৰু ইডিৰ শীৰ্ষ বিষয়াৰ মন্তব্যও প্ৰকাশ কৰিছে কাকতখনে। কাকতখনৰে এই সন্দৰ্ভত হোৱা বাৰ্তালাপত চিবিআইৰ শীৰ্ষ বিষয়াই কয় যে প্ৰতিটো অনুসন্ধান আৰু তদন্ত সাক্ষ্য প্ৰমাণৰ ভিত্তিত চলোৱা হয় আৰু ইয়াৰে কিছুমান বিভিন্ন কাৰণত লেহেমীয়া হৈ পৰিছে যদিও বন্ধ কৰা হোৱা নাই। একেদৰে ইডি বিষয়া এগৰাকীয়ে কয় যে আন সংস্থাসমূহৰ গোচৰৰ ভিত্তিতহে তেওঁলোকে অনুসন্ধান আৰম্ভ কৰে। 'যদিহে আন অনুসন্ধানকাৰী সংস্থাসমূহে গোচৰ বন্ধ কৰি দিয়ে তেতিয়া ইডিৰ পক্ষে সেই গোচৰ আগবঢ়াই লৈ যোৱাতো কঠিন হৈ পৰে। হ’লেও আমি তেনে বহু গোচৰত অভিযোগনামা দাখিল কৰিছো। যিবোৰ গোচৰৰ অনুসন্ধান চলি আছে তেনে গোচৰত যেতিয়াই প্ৰয়োজন হ’ব তেতিয়াই ব্যৱস্থা গ্ৰহণ কৰা হ’ব।’-এইদৰে কয় ইডিৰ বিষয়াগৰাকীয়ে। 

বিৰোধীক নিঃশেষ কৰাৰ ষড়যন্ত্ৰ বিজেপিৰ!

নৰেন্দ্ৰ মোদী চৰকাৰে ভাৰতৰ ৰাজনীতি বিৰোধীশূণ্য কৰাৰ লক্ষ্যৰে ষড়যন্ত্ৰমূলকভাৱে বিৰোধী নেতাৰ বিৰুদ্ধে চলাইছে ইডি, চিবিআই, আইটি আদিৰ দৰে ‘মোদীভক্ত’ সংস্থাৰ অভিযান! বিগত ১০ বছৰত বিৰোধীয়ে এই অভিযোগ বাৰে বাৰে উত্থাপন কৰি আহিছে। বহু বিৰোধী নেতাক ইডি-চিবিআই আদিৰ দৰে সংস্থাৰ জৰিয়তে ভয় ভাবুকি দেখুৱাই হয় বিজেপিত যোগদান কৰিবলৈ বাধ্য কৰোৱা হৈছে, নহয় কাৰাগাৰলৈ প্ৰেৰণ কৰা হৈছে। বিশেষকৈ অ-বিজেপি শাসিত ৰাজ্যত এতিয়া লোকসভা নিৰ্বাচনৰ প্ৰাকক্ষণত সক্ৰিয় কৰা হৈছে এনেধৰণৰ চৰকাৰী সংস্থাসমূহক।

চলিত বছৰৰে ৩১ জানুৱাৰীৰ সন্ধ্যা মুখ্যমন্ত্ৰী পদৰ পৰা পদত্যাগ কৰাৰ মাত্ৰ কেইমুহূৰ্তমানৰ পিছতে ইডিয়ে গ্ৰেপ্তাৰ কৰিছিল ঝাৰখণ্ড মুক্তি মৰ্চাৰ নেতা হেমন্ত ছোৰেনক। ভূমি কেলেংকাৰী আৰু ধন সৰবৰাহৰ গোচৰত বিগত এটা বছৰত ১০ খনকৈ চমন জাৰি কৰাৰ পিছত অৱশেষত গ্ৰেপ্তাৰ কৰা হৈছিল হেমন্ত ছোৰেনক। ঝাৰখণ্ডৰ প্ৰাক্তন মুখ্যমন্ত্ৰীগৰাকীৰ গ্ৰেপ্তাৰক লৈ অলেখ প্ৰশ্নৰে অৱতাৰণা হৈছিল। এই গ্ৰেপ্তাৰ অসাংবিধানিক বুলিও বিৰোধীয়ে অভিযোগ কৰি আহিছে। 

কিন্তু কেৱল হেমন্ত ছোৰেনেই নহয়! লোকসভা নিৰ্বাচনৰ তাৰিখ ঘোষণা হোৱাৰ পিছতে স্বাধীন ভাৰতত প্ৰথমবাৰৰ বাবে সংঘটিত হয় আন এক নজিৰবিহীন ঘটনা। জনতাৰ দ্বাৰা নিৰ্বাচিত এগৰাকী মুখ্যমন্ত্ৰীক ক্ষমতাত থকা সময়তে ইডিয়ে গ্ৰেপ্তাৰ কৰে। দিল্লীৰ মুখ্যমন্ত্ৰী অৰবিন্দ কেজৰিৱালৰ এই গ্ৰেপ্তাৰে সমগ্ৰ দেশতে তীব্ৰ প্ৰতিক্ৰিয়াৰ সৃষ্টি কৰে। দিল্লীৰ সুৰা নীতিৰ কেলেংকাৰী গোচৰত কেজৰিৱালৰ গ্ৰেপ্তাৰে নিৰ্বাচনৰ সময়ত বিৰোধীৰ প্ৰতি বিজেপিৰ শংকা প্ৰকট কৰি তোলা বুলিও বিভিন্নজনে দাবী কৰে। 

বৰ্তমান ন্যায়িক জিম্মাত তিহাৰ জে’লত বন্দী হৈ আছে দিল্লীৰ মুখ্যমন্ত্ৰী অৰবিন্দ কেজৰিৱাল। অৱশ্যে এতিয়াও তেওঁ মুখ্যমন্ত্ৰী পদৰ পৰা পদত্যাগ কৰা নাই, বন্দীত্বৰ ফাঁকেৰেই তেওঁ শাসন চলাই আছে। বুধবাৰে কেজৰিৱালৰ জামিন আবেদনৰ শুনানি গ্ৰহণ কৰিছে দিল্লী উচ্চ ন্যায়ালয়ে। আদালতে ৰায় সংৰক্ষণ কৰি ৰাখিছে। আম আদমী পাৰ্টিয়ে আশা প্ৰকাশ কৰা মতে, লোকসভা নিৰ্বাচনৰ পূৰ্বেই মুকলি আকাশৰ তললৈ ওলাই আহিব পাৰিব অৰবিন্দ কেজৰিৱালে।