গুৱাহাটীঃ দালাই লামা বৰ্তমান গুৱাহাটীত। সমগ্ৰ অসমবাসীৰ লগতে কিন্তু আধ্যাত্মিক গুৰু লামাৰ ওপৰত কঢ়া নজৰ ৰাখিছে চীনে। কিয়নো ভাৰত-চীন সীমান্তৱৰ্তী এলেকাত লামাৰ চাল-চলনক লৈ সন্দেহৰ আৱৰ্তত আছে চীনা চৰকাৰ।
অসমৰ নমামিৰ মহোৎসৱৰ লগতে ৪ তাৰিখৰপৰা অৰুণাচল ভ্ৰমণ কৰিব আধ্যাত্মিক গুৰুজনে। কিন্তু তাকে লৈ চিন্তিত হৈ পৰিছে চীনা চৰকাৰ। কেৱল চিন্তিত হোৱাই নহয়, হিমালয়ৰ পাদদেশৰ ভাৰত-চীন সীমান্তৱৰ্তী স্পৰ্শকাতৰ এলেকাত কেন্দ্ৰীয় চৰকাৰৰ সীমাক লৈ আগ্ৰাসনমূলক নীতিক নিন্দা কৰিছে চীনা চৰকাৰে।
''ভাৰত-চীন সীমান্তৱৰ্তী এলেকাত চতুৰ্দশ দালাই লামাৰ সাক্ষাতৰ চীনদেশে পোনচাটেই বিৰোধীতা কৰে’’- ৰাজধানী চহৰ বেইজিঙত এইবুলি বিবৃতি দিছে চীনৰ বৈদেশিক মন্ত্ৰী মুখপাত্ৰ লু কাঙে। দেশদুখনৰ সম্পৰ্কৰ ওপৰত দালাই লামাৰ ভ্ৰমণৰ নেতিবাচক প্ৰভাৱ পৰিব বুলিও চীনা মন্ত্ৰীজনে কৈছে।
কিন্তু ইয়াৰ প্ৰত্তু্ত্যৰো নিদিয়া নহয় ভাৰত চৰকাৰে। ভাৰতৰ বৈদেশিক মন্ত্ৰালয়ে এক বিবৃতিযোগে কৈছে যে ভাৰত এখন ধৰ্মনিৰপেক্ষ ৰাষ্ট্ৰ হেতুকে দেশৰ যিকোনো ঠাইত লামাই যোৱাত বাধা নাই। মাৰ্চ মাহৰ আৰম্ভণিৰ ভাগত দালাই লামাক ভাৰত চৰকাৰৰ প্ৰতিনিধিবৰ্গই সাক্ষাৎ কৰাৰ কথাও জনায় মন্ত্ৰালয়ে। কিন্তু চীনৰ চকুত বিচ্ছিন্নতাবাদী ধৰ্মীয় গুৰু হিচাপে জনা দালাই লামাৰ কাৰ্যকলাপক ভাৰতৰ সমৰ্থনে চীনক অসন্তুষ্ট কৰি তুলিছে।
চীনৰ নিষেধাজ্ঞা স্বত্বেও নমামি মহোৎসৱ উপলক্ষে অসমত উপস্থিত হোৱা তিব্বতৰ আধ্যাত্মিক গুৰুজন আজি পুৱাৰ ভাগত গুৱাহাটী লোকপ্ৰিয় গোপীনাথ বৰদলৈ বিমান বন্দৰত উপস্থিত হয়। ইণ্ডিগ’ৰ এখন বিশেষ বিমানেৰে শান্তিৰ নোবেল বঁটাবিজয়ী ধৰ্মীয় গুৰুজন দা আসাম ট্ৰিবিউনৰ প্লেটিনাম জয়ন্তীত ভাগ লোৱাৰ বাবে মাছখোৱা আটিএত যায়।
তাৰ পিছতে আৰক্ষীৰ কটকটিয়া নিৰাপত্তাৰ মাজেৰে তেওঁক পোনে পোনে লৈ যোৱা হৈছে ৰেডিচন ব্লু'ত। য'ত তেওঁ দুপৰীয়াৰ আহাৰ গ্ৰহণ কৰিব। নিশা ৰেডিচন ব্লু'ত কটাই দেওবাৰে তেওঁ অংশ গ্ৰহণ কৰিব গুৱাহাটী বিশ্ববিদ্যালয়ৰ প্ৰেক্ষাগৃহত কৃষ্ণকান্ত সন্দিকৈ মুক্ত বিশ্ববিদ্যালয়ৰ এক অনুষ্ঠানত। তাৰ পিছত তেওঁ কাইলৈ দুপৰীয়াৰ ভাগত উপস্থিত হ'ব নমামি ব্ৰহ্মপুত্ৰ মহোৎসৱত।