নতুন দিল্লীঃ ধৰ্মীয় স্বতন্ত্ৰতা আৰু ব্যক্তিৰ মৰ্যাদা-এই দুটা বিষয়ৰ মাজতে দুলি থকা বহুবিতৰ্কিত তিনি তালাকক লৈ ঐতিহাসিক সিদ্ধান্ত লোৱাৰ দিশে আগবাঢ়িছে দেশৰ সৰ্বোচ্চ ন্যায়ালয়খন৷ দেশজুৰি চৰ্চিত হৈ থকা বিষয়টো সন্দৰ্ভত শুনানি অহা ১১ মেত হ’ব বুলি ঘোষণা কৰিছে দেশৰ সৰ্বোচ্চ ন্যায়ালয়খনে৷ ৫ জন ন্যায়ধীশৰ এখন বিচাৰপীঠে এই বিতৰ্কিত বিষয়টোত ৰায়দান কৰিব৷
মুছলমান সম্প্ৰদায়ৰ তিনি তালাক, নিকাহ হালাল আদি বিষয়ত সাংবিধানিক বিশ্লেষণ আগবঢ়াব এই বিচাৰপীঠে৷ চাৰিদিনলৈ এই বিচাৰপীঠৰ শুনানী চলিব৷
বিষয়টো অতিকে গুৰুতৰ হেতুকে ইয়াক এৰাই চলিবপৰা নাযায় বুলিও ন্যায়ালয়ে মন্তব্য কৰিছে৷ মুখ্য ন্যায়াধীশ জগদীশ সিং খেহৰে কয় যে বিষয়টোৰ কেৱল আইনী দিশহে শুনানীত সামৰি লোৱা হ’ব৷ বৃহস্পতিবাৰে বিষয়টো সন্দৰ্ভত ৪ টা প্ৰশ্ন উত্থাপন কৰে কেন্দ্ৰীয় চৰকাৰে৷
আপোনাক চিন্তাত পেলাবপৰা কেন্দ্ৰীয় চৰকাৰৰ প্রশ্ন ৪টাঃ
- ধৰ্মীয় স্বতন্ত্ৰতাৰ আধাৰত তিনি তালাক, হালাল , বহু-বিবাহ আদিৰ অনুমতি সংবিধানৰ ভিত্তিত দিব পৰা যায় নে?
- সমতাৰ অধিকাৰ আৰু মৰ্যাদাসহকাৰে জীয়াই থকাৰ অধিকাৰৰ সৈতে ধৰ্মীয়া স্বতন্ত্ৰতাৰ অধিকাৰৰ কোনটোক অগ্ৰাধিকাৰ দিয়া যাব?
- ব্যক্তি স্বাধীনতাৰ আইনক সংবিধানৰ ১৩ নং অনুচ্ছেদৰ আধাৰত আইন হিচাপে অনুপালন কৰা হ’ব নে নাই?
- আন্তঃৰাষ্ট্ৰীয় আইনৰ আধাৰত তিনি তালাক, হলাল, বহু-বিবাহ আইনসংগত বুলি ক’ব পৰা যায় নেকি য’ত ভাৰতেও স্বাক্ষৰ কৰিছে ?
কেন্দ্ৰীয় চৰকাৰকে ধৰি বিভিন্ন মহলে ভালেমান প্ৰশ্ন উত্থাপন কৰিছে যিবোৰ ৩০ মাৰ্চৰ ভিতৰত এটৰ্ণি জেনেৰেলৰ হাতত জমা দিয়াৰ বাবে আজি ন্যায়ালয়ে নিৰ্দেশ দিয়ে৷ এই দিশসমূহৰ ওপৰত আদালতে বিচাৰ কৰিব বুলি ন্যায়ালয়ে কয়৷
আইন মন্ত্ৰী ৰবিশংকৰ প্ৰসাদে বিষয়টো সন্দৰ্ভত কয় যে সংবিধানৰ সৈতে জড়িত হৈ থকা বিষয়টো গুৰুত্বপুৰ্ণ৷ ইতিমধ্যে ২০খন দেশত নিষিদ্ধ ঘোষণা কৰা এই প্ৰথাৰ ওপৰত আস্থা নাই বুলিও ৰবিশংকৰে কয়৷