ডিজিটেল ডেস্কঃ ধাৰাসাৰ বৰষুণে এতিয়া অভিশাপ মাতিছে বাংগালুৰুবাসীৰ বাবে৷ বৰষুণৰ বাবে চহৰখনৰ এক বিশেষ অঞ্চলত দেখা গৈছে তুষাৰপাত৷ অৱেশ্যে প্ৰাকৃতিক তুষাৰপাতৰ পৰিৱৰ্তে সেয়া ৰাসয়নিক তুষাৰপাতহে৷
চহৰখনৰ ভাৰ্থুৰ হ্ৰদৰ ওচৰৰ অঞ্চলসমূহত সৃষ্টি হৈছে এই ৰাসয়নিক তুষাৰপাতৰ৷ মূলতঃ বিগত এক সপ্তাহৰ বৰষুণৰ ফলত হ্ৰদটোত থকা ৰাসয়নিক পদাৰ্থবোৰত ফেনৰ সৃষ্টি হৈছে৷ আৰু এই ফেনবোৰ বিয়পি পৰিছে ওচৰৰ অঞ্চলসমূহলৈ৷ এতিয়া এই ফেনসমূহৰ পৰা লোকসকলৰ বিভিন্ন শাৰীৰিক সমস্যাই দেখা দিয়াৰ আশংকা কৰা হৈছে৷
পথসমূহত এই ফেন বিয়পাত সৃষ্টি হৈছে তীব্ৰ যান-জঁটৰ৷ আনকি বাইক চলাওঁতে হেলমেট পিন্ধিও সাৰি যাব পৰা নাই এই তুষাৰপাতৰ পৰা৷ চহৰখনৰ ডেভেলপমেন্ট অথৰিটি আয়ুক্ত ৰাকেশ সিঙে সমগ্ৰ অঞ্চল পৰিদৰ্শন কৰিছে৷
তদুপৰি চহৰখনৰ আন এটা হ্ৰদতো অনুৰূপ ঘটনা সংঘটিত হ’ব ধৰিছে৷ মূলত চহৰখনৰ পেলনীয়া দ্ৰব্যসমূহ হ্ৰদত পেলোৱাৰ ফলতে এই পৰিস্থিতিৰ উদ্ভৱ হৈছে।