Printer-friendly version

গুৱাহাটীঃ গুটখা, পাণ-মচলা এবছৰৰ বাবে নিষিদ্ধ কৰাৰ চৰকাৰী নিৰ্দেশনাটো আপোনাৰ মনত আছে নে? চৰকাৰ সংশ্লিষ্ট বিভাগেই সম্ভৱতঃ পাহৰিলে এই বিষয়ে। নিৰ্দেশনা ওলোৱাৰ তিনিমাহ পিছতো নিৰ্দেশনা কাৰ্যকৰীকৰণৰ নহ'ল কোনো ব্যৱস্থা। বিভাগৰ হেমাহিয়ে পুনৰবাৰ প্ৰতিপন্ন কৰিলে চৰকাৰী তৎপৰতাৰ আন্তঃসাৰশূন্যতা। জনস্বাস্থ্য প্ৰতি অসম চৰকাৰ কিমান দায়বদ্ধ?

ধোঁৱাবিহীন ধপাতযুক্ত সামগ্ৰীসমূহে জনস্বাস্থ্যৰ প্ৰতি এক ভাবুকি কঢ়িয়াই আনিছে৷ সেয়ে জনস্বাস্থ্যৰ প্ৰতি লক্ষ্য ৰাখি এই ধপাতজাতীয় সামগ্ৰীসমূহৰ ওপৰত নিষেধাজ্ঞাও জাৰি কৰা হয়৷ সময়ে সময়ে চৰকাৰৰ লগতে বে-চৰকাৰী সংস্থাসমূহেও ধপাতজাতীয় সামগ্ৰীসমূহৰ অপকাৰিতাৰ ওপৰত ভিত্তি কৰি সজাগতা সভা অনুষ্ঠিত কৰি আহিছে। কিন্তু ধপাতজাতীয় সামগ্ৰী নিয়ন্ত্ৰণৰ ক্ষেত্ৰত ধনাত্মক ফলাফল লাভ কৰাতো এতিয়ালৈকে পৰিলক্ষিত হোৱা নাই৷  

খাদ্য সুৰক্ষা বিভাগৰ নিষেধাজ্ঞা 

ৰাজ্যৰ খাদ্য সুৰক্ষা বিভাগে জনস্বাস্থ্যৰ প্ৰতি লক্ষ্য ৰাখি যোৱা ২২ নৱেম্বৰত এক নিৰ্দেশনাৰ জৰিয়তে গুটখা, পাণ মচলা আদি নিয়ন্ত্ৰণৰ ক্ষেত্ৰত জাৰি কৰিছিল এবছৰীয়া নিষেধাজ্ঞা৷ অকল ধোঁৱাবিহীন ধপাতজাতীয় সামগ্ৰীসমূহৰ ওপৰতে নহয় উৎপাদন, মজুত কৰা আৰু পৰিবহণৰ ক্ষেত্ৰতো আৰোপ কৰা হৈছিল নিষেধাজ্ঞা। 

নিৰ্দেশনাটোত এই কথাও উল্লেখ আছিল যে যদি কোনো ব্যক্তি গুটখা, পাণ মচলা আদি সামগ্ৰীসমূহ বিক্ৰী বা তেনেধৰণৰ কামৰ লগত জড়িত থকাতো প্ৰশাসনৰ দৃষ্টিগোচৰ হয় তেনেহ’লে আইন অনুসৰি সেই ব্যক্তিজন  দণ্ডনীয় হ’ব৷ কিন্তু নিষেধাজ্ঞা জাৰি কৰাৰ ৩ মাহ পাৰ হৈ যোৱাৰ পাছতো পূৰ্বৰ দৰেকৈ সমগ্ৰ ৰাজ্যতে ধপাতজাতীয় সামগ্ৰী উৎপাদন প্ৰতিষ্ঠানে উৎপাদন কৰিয়েই আছে আৰু খুচুৰা বিক্ৰেতাসকলে সহজেই এই সামগ্ৰীসমূহ বিক্ৰী কৰি আছে৷ 

খুচুৰা বিক্ৰেতাসকলে কি কয়? 

কেৱল গুৱাহাটীতে নহয় ৰাজ্যৰ প্ৰায়বিলাক অঞ্চলৰ দোকানতে নিষেধাজ্ঞা জাৰি কৰাৰ পিছতো মুকলিকৈ বিক্ৰী হৈ আহিছে গুটখাৰ পেকেট৷ নিষেধাজ্ঞা জাৰি কৰাৰ পিছতো দোকানীসকলে এনেদৰে গুটখা আৰু ধপাতজাতীয় সামগ্ৰীসমূহ বিক্ৰী কৰি থকা বিষয়টোৱে হতভম্ব কৰি তুলিছে সচেতন মহলক।

এই সন্দৰ্ভত কেবাজনো খুচুৰা ব্যৱসায়ীয়ে NNOৰ আগত কয় যে নিষেধাজ্ঞা জাৰি কৰা কথাটো তেওঁলোকে বাতৰিতহে পাইছে যদিও বিভাগীয় কোনো লোক আহি তেওঁলোকক সেই বিষয়ে অৱগত কৰোৱা নাই। 'আমি বেচিয়েই আছো। শিখৰ, ৰজনীগন্ধা, কেপি, বিমল চলিয়েই আছে। সবেই কিনিয়েই আছে। এদিন শ্ৰীমতীয়ে ক’লে যে টিভিত বোলে গুটখা বন্ধ কৰিব বুলি চৰকাৰে নিৰ্দেশ দিছে। মোবাইলতে ময়ো চালো নিউজটো৷ ভয়ো লাগিল অলপ নিউজটো শুনি। সেই যে নিউজতে পালো কথাটো, তাৰ পিছত আমালৈ কিন্তু কোনো জাননী অহা নাই৷ এতিয়া এইবোৰ বেছি আছো এনেকৈ।’-এইদৰে কয় চানমাৰি অঞ্চলৰ এজন পাণ দোকানীয়ে।

'চৰকাৰে নিষেধাজ্ঞা জাৰি কৰি কিডাল কৰিব পাৰিছে? সেই নিষেধাজ্ঞা অকল এদিনৰ কাৰণেহে৷ দেখিছাই বজাৰত ইয়াৰ প্ৰচলন হৈয়ে আছে৷  আমি খুচুৰা ব্যৱসায়ী হে, চৰকাৰে যদি ধপাতজাতীয় সামগ্ৰী নিষিদ্ধ কৰিব বিচাৰিছে প্ৰথমে কোম্পানীবোৰ বন্ধ কৰি নিদিয়ে কিয়? আমাৰ ওপৰত নিষিধাজ্ঞা জাৰি কৰিলে কি হ’ব? এইবোৰ চৰকাৰৰ নাটক। এইবোৰ বহুত দেখিলো। কাম নাই এইবোৰৰ। খোৱাই খায়েই আছে, খায়েই থাকিব। আমাৰনো কি? বেচিব লাগে, বেছি আছো, আমি বেপাৰী মানুহ। এইবোৰ বেছি যি দুই-এপইচা পাও তাৰেই সংসাৰ চলে আমাৰ।-আন এজন পাণ দোকানীৰ ক্ষোভ মিহলি মন্তব্য৷

নিষেধাজ্ঞাৰ পিছতো কিয় সহজে পোৱা যায় ৰজনীগন্ধা, কেপি?

নিষেধাজ্ঞা জাৰি কৰাৰ পিছতো যদি গুটখা, পাণ-মচলা বজাৰত উপলব্ধ হৈয়েই থাকে তেন্তে সেই নিষেধাজ্ঞাৰ কামেই বা কি? কেৱল কাগজে-কলমে সীমাৱদ্ধ থকা নিষেধাজ্ঞাই জনসাধাৰণৰ স্বাস্থ্যক সুৰক্ষা দিব পাৰিবনে? কি কাৰণত নিষেধাজ্ঞা জাৰি কৰিও এইবোৰৰ বিক্ৰী বন্ধ কৰি দিয়া নাই চৰকাৰে? নে কেৱল ৰাইজৰ বাঃ বাঃ ল’বৰ বাবেহে চৰকাৰে সময়ে সময়ে নিষেধাজ্ঞা জাৰি কৰে? 

এই সন্দৰ্ভত খাদ্য সুৰক্ষা বিভাগৰ এগৰাকী শীৰ্ষ বিষয়াই NNOৰ আগত কয় যে নিষেধাজ্ঞাক লৈ যিধৰণে ভবা হৈছে সেইধৰণে নিষেধাজ্ঞা জাৰি কৰা হোৱা নাই। বিষয়াগৰাকীয়ে জনোৱা মতে যিসমূহ  গুটখা, পাণ-মছলাত ধপাত জাতীয় সামগ্ৰী মিহলি হৈ থাকে আৰু নিক’টিনৰ মাত্ৰা অধিক সেইসমূহ  গুটখা, পাণ-মছলাৰ ওপৰতহে নিষেধাজ্ঞা আৰোপ কৰা হৈছে।

'সকলোধৰণৰ গুটখা, পাণ-মচলাত নহয়, ধপাত জাতীয় সামগ্ৰী মিহলি হৈ থকা গুটখা, পাণ-মচলাৰ ওপৰতহে নিষেধাজ্ঞা জাৰি কৰা হৈছে৷ সাধাৰণতে দোকানসমূহত যিবিলাক পেকেট যেনে ৰজনীগন্ধা, কেপি আদি ওলমি থকা দেখিবলৈ পোৱা যায় সেই সামগ্ৰীসমূহৰ ওপৰত কোনো নিষেধাজ্ঞা নাই৷ আমাৰ বিভাগৰ ফালৰ পৰা এইবোৰ পৰীক্ষা কৰা হৈছে আৰু তাত নিকটিন, ধপাত পোৱা হোৱা নাই৷ সেয়ে দোকানসমূহত সেইবোৰ বিক্ৰী কৰি থকাৰ ক্ষেত্ৰত কৰিবলগীয়া আমাৰ একো নাই।’-এইদৰে কয় বিষয়াগৰাকীয়ে।

অৱশ্যে খাদ্য সুৰক্ষা বিভাগৰ এনে নীতি সন্দৰ্ভত দীৰ্ঘদিনৰে পৰা প্ৰতিবাদ জনাই আহিছে কঠোৰ ধপাত বিৰোধী আইনৰ সমৰ্থকসকলে। তেওঁলোকৰ মতে বৰ্তমানৰ আইনখন হৈছে ঢোঁৰা সাপৰ দৰে। বিশেষকৈ দোকানত ওলমি থকা গুটখা, পাণ মচলাসমূহত নিকটিন নাই বুলি গা এৰা দি অহা বিভাগটোৱে তাৰ সৈতে সুকীয়াকৈ বিক্ৰী কৰা জৰ্দাৰ পেকেটক লৈ কিয় নীৰৱ বুলিও প্ৰশ্ন কৰি আহিছে সচেতন লোকসকলে। 


অসম চৰকাৰৰ ধপাত বিৰোধী আইন কিমান শক্তিশালী?

গুটখা নিষিদ্ধকৰণৰ বাবে অসম চৰকাৰে ২০১৩ চনত ধপাত বিৰোধী আইন প্ৰস্তুত কৰিছিল৷ বিধানসভাতো এই আইনখন গৃহীত হৈছিল৷ কিন্তু এই আইন প্ৰণয়ন কৰাৰ পাছতে গুটখা উৎপাদনকাৰী প্ৰতিষ্ঠানসমূহে গুৱাহাটী উচ্চ ন্যায়ালয়ত এক গোচৰ ৰুজু কৰে৷ তাৰ লগে লগে ন্যায়ালয়ৰ মেৰপেচত সোমাই পৰে অসম চৰকাৰে ধপাত জাতীয় সামগ্ৰী নিষিদ্ধকৰণৰ বাবে প্ৰস্তুত কৰা উক্ত আইনখন৷