ডিজিটেল ডেস্কঃ সময়ৰ বুৰঞ্জী ৰচনা কৰা মহান বিজ্ঞানী ষ্টিফেন উইলিয়াম হকিং খোদ ইতিহাস হ’ল৷ বিশ্ব ব্ৰহ্মাণ্ডৰ ৰহস্যৰ উৎস বিচাৰি ফুৰা ষ্টিফেন উইলিয়াম হকিং বিলীন হ’ল পঞ্চভুতত৷ ১৪ মাৰ্চৰ পুৱাৰ ভাগত ইংলেণ্ডৰ কেম্ব্ৰিজৰ নিজা বাসগৃহত ষ্টিফেন হকিঙে মৃত্যুক আকোৱালি লয়৷
নিউটন আৰু এলবাৰ্ট আইনষ্টাইনৰ পিছতে বিশ্বৰ সৰ্বশ্ৰেষ্ঠ বিজ্ঞানী হিচাপে পৰিচিত ষ্টিফেন হকিঙৰ বুধবাৰে মহাপ্ৰয়াণ ঘটে৷ হকিঙ আছিল এগৰাকী তত্বমূলক পদাৰ্থবিদ তথা মহাকাশ বিজ্ঞানী৷ ২১ বছৰ বয়সতে হকিঙৰ দেহত দেখা দিয়ে মটৰ নিউৰন নামৰ ৰোগে৷
এই ৰোগে হকিঙৰ শৰীৰৰ স্নায়ুবোৰ এফালৰ পৰা ধ্বংস কৰি অহা স্বত্বেও বিজ্ঞানৰ সাধনা অব্যাহত ৰাখিছিল বিজ্ঞানীগৰাকীয়ে। হকিঙৰ মৃত্যুৰ সময়ত বয়স আছিল ৭৬ বছৰ৷
জন্মঃ ইংলেণ্ডৰ অক্সফৰ্ডত ড০ ফ্ৰেংক হকিং আৰু ইছাবেল হকিঙৰ ঔৰসত ষ্টিফেন হকিঙৰ জন্ম হৈছিল ১৯৪২ চনৰ ৮ জানুৱাৰীত৷ ট্ৰিনিটি হল আৰু কেম্ব্ৰিজত তত্বমূলক মহাকাশ বিজ্ঞান বিষয়ত অধ্যয়ন কৰিছিল৷
শিক্ষাঃ ষ্টিফেন হকিঙে ছেণ্ট এলবান হাইস্কুলত শিক্ষা জীৱন আৰম্ভ কৰিছিল৷ অক্সৰ্ফড বিশ্ববিদ্যালয়ৰ পৰা ১৯৬২ চনত স্নাতক ডিগ্ৰী লাভ কৰি হকিঙে মহাকাশ বিজ্ঞান বিষয়ত অধ্যয়ন কৰে৷ হকিঙে লাভ কৰিছিল ১২টা ডিগ্ৰী৷
কৰ্মঃ বিশ্বব্ৰহ্মাণ্ডৰ মৌলিক সূত্ৰসমূহৰ ওপৰত বিশ্লেষণ কৰাই আছিল হকিঙৰ প্ৰধান উদ্দেশ্যে৷ ষ্টিফেন হকিঙে পেনৰজ’ৰ সৈতে লগ হৈ আইনষ্টাইনৰ আপেক্ষিকতাবাদৰ সূত্ৰক প্ৰমাণ কৰি দেখুৱাইছিল যে মহাকাশ আৰু সময় বিগ বেঙৰ জৰিয়তে আৰম্ভ হোৱাৰ বিপৰীতে সমাপ্তি হয় কৃষ্ণ গহ্বৰত৷ ইয়াৰোপৰি হকিঙে চেণ্টাৰ ফৰ থিয়ৰিটিকেল কচম’ল’জি, কেম্ব্ৰিজ বিশ্ববিদ্যালয়ত গৱেষণা সঞ্চালক হিচাপে কাম কৰিছিল৷
সাহিত্যকৰ্মঃ ষ্টিফেন হকিঙে অনুপম সাহিত্য সৃষ্টি কৰি ইংৰাজী সাহিত্যক চহকী কৰিছে৷ The large scale structure of spacetime with G FR Ellis, General realitivity_ An einsrien centenary survey with W Israel and 300 years of gracity with W Israel, A brief hidtory of time, A briefer history of time, Black holes and baby universes and other Essays, The univers in a Nutshell আৰু The grand design নামৰ গ্ৰন্থ লিখি থৈ গৈছে৷
ফটোঃ হকিঙৰ জীৱনক লৈ ২০১৪ চনত নিৰ্মিত 'দা থিয়ৰি অৱ এভ্ৰিথিং' ছবিখন
সন্মানঃ ষ্টিফেন হকিঙে ২০০৯ চনত আমেৰিকা যুক্তৰাষ্ট্ৰৰ সৰ্বোচ্চ অসামৰিক সন্মান ‘প্ৰেচিডেন্সিয়েল মেডেল অব ফ্ৰীডম সন্মানেৰে বিভূষিত হৈছিল৷ তদুপৰি হকিঙে ‘ৰয়েল ছ’ছাইটি অৱ আৰ্টছ’ৰ সন্মানীয় ফেল’শ্বিপ’ লাভ কৰাৰ লগতে ‘পণ্টিফিকেল একাডেমীৰ আজীৱন সদস্য’ পদত অধিষ্ঠিত হৈছিল৷